Malaysia Mizote Kristmas Hmuakin Picnic

Ni 11 December 2010, Inrinni : Mizo Christian Fellowship  bultumin Malaysia ram chhung hmun hrang hranga awm Mizo 220 velin Kuala Lumpur atanga 90km vel hla, Negeri Sembilan state-a  awm tuifinriat kam “Port Dickson (beach ) ”-ah  Kristmas hmuakin an picnic. Picnic kal nan hian Bus lian 5 zet hman a ni. Zing dar 9:10-ah Port Dickson lam panin  Kuala Lumpur atang an chhuak a, a hmunah darkar 6 vel hun an hmang a, tlai dar 5-ah Kuala Lumpur lam panin an haw. MCF Quarter, Kuala Lumpur atangin Port Dickson hi Bus-in darkar 2:15 vel tlan a ni.

Kristmas hmuaka picnic kal Mizote hian inpawh takin, hlim takin hun an hmang a, nuam an ti hle. Kalkhawm zinga tlangval pakhat chuan, “Mizo society hi a nuam ber a, Mizo nunzia hi a mawiin a hlu ber mai – inpawh leh innel tak, inzahtawn chung siin kan awmho nak nak thin a...,” tiin  Zotui Thiang a hrilh.

Rawngbawltu pahnih – tuna MCF pastor hna chelh mektu Rev.Lalthuamluaia leh MCF pastor hna chelh mai tur Rev.Gospel Hrilvelthanga, MCF President, Secretary leh kohhran upa dangten he picnic hi an telpui thei a, an thla a muang hle. Hetiang hian Malaysia-a awm Mizote hian kum khatah vawi 2/3 vel  intihhlimna/ thil tihhona ni bik an hmang thin a. Chu chuan Malaysia ram hmun hrang hranga awm Mizote inhmuhkhawmna hun hlu a siam a, inhriattawnna, inneltawnna, infuihtawnna leh thil dang atan a tangkai hle. Hetiang ni awm hun tur hi hmun hrang hranga hnathawka awm, duh duh huna chawlh la thei lote pawhin  an nghakhlel a, hetiang ni hi chuan chawlh a, mahni mi leh sate thil tihhonaa tel ve theih hram an tum thin.