Malaysia Lung in-ah Burma mi tam ber

Tunlai hian Burma ram mi Malaysia lung ina tang mek, mi 32 an thi a, hei hi lung ina mitthi tam ber tum niin an sawi.

Malaysaia Home Minister Hishammuddin-a chuan  2005-2009 inkar hian foreign mi lung in tang mi 78 thi angin a sawi a,  chutih laiin SUARAM (NGO Human rights committee) erawh chuan kum kalta kum 5 chhung khan Burma mi ringawt pawh mi 100 aia tlem lo, lung in tang mekte an thi tawh niin a sawi ve thung (Hei hi Burma  lung in tangte hnen atanga thu dawn dan a ni). Ramdang mi lung in tangte hi tunhma kum 6 chhung khan, mi 1300 lai an thi tawh tiin Malaysian Bar Council 2009 chuan a report bawk.

Malaysia Lung ina tang ram dang mite hi Burma, Indonisia, India, Bangladesh, Cambodia, Vietnam, Thailand, Nigeria, Togo, Pakistan, Liberia leh Philippine ram mite an ni tlangpui.
   
Lung in-a tang tam takte thih chhan hi sawrkarin damdawi an mamawh anga a pek loh vang a ni ber a. An nat chhan tam ber chu tui that loh vang leh a hmun thianghim tawk loh vang mai bakah taksa mamawh tawk tur eiin pek loh vangte an ni. Heng thil thleng hi SUARAM hian a ngaipawimawh a,  sawrkar pawh an nawr nasa, mahse thubuai lak theih tur hial a, dilchhut taka zawhfiah erawh chu sawrkar hian a phal lo thung. Malaysia ramah hian Immigration lung in 28 a awm a, tui leh chaw a that tawk loh bakah thawmhnaw inthlakna tur takngial pawh an pe lo bawk.
   
Malaysia ramah hian Burma mi nuai 5 lai awmin  hriat  a ni a, chung mite chu  permit nei leh nei lote an ni hlawm. Lung in hmun tinah hian Burma mi an tang tam ber zel a, a chhan chu permit nei lo an tam vang a ni. May - August, 2009 khan Burma mi lung in tang mi 9 ngawt an thi tawh bawk a, an ni pawh hi tui   leh ei in that loh vanga natna lo awm chi avanga thi niin an sawi.

 International Watchdog-in a sawi danin Malaysia ram hi refugee enkawl chungchangah hnufual hle niin a sawi a, US refugee commintte pawhin refugee chungchang mai bakah (Human trafficking)  mihring zalenna kharsakna kawngah pawh hnufual hlein a sawi ve bawk. Engpawhnise tuna kan khawsakna ram a ni mauh si a, kan khawsak danah i fimkhur ang u.
(July 30 Irrawaddy )

Thulakna: MCF Palai , Vol 03  Issue 154