MALAYSIA-AH MIZO NULA EM(PING) NEN

Ni 20 March 2010 (Inrinni) khan Mizo nula pakhat emping nen Malaysia a rawn kal a.Chu nu chu a kalna zawna kalve tak mai,mi thenkhat tena an sawisel hial thin,mi pangngai ang ve maia lang / khawsa – a tum leh a thawh erawh entawn tlak tak mai a ni.

Hmanlai kha chuan Mizo nulate hnathawh kha in chhung lam,khaw chhung lam chet vel kha a ni ber a.An kal hlat ber-ah thingphurin Em(ping) nen an chhuak thin.Kan hun-tawng erawh hi zawng  fin-thiam zirna lama intlansiak a,thil intih-theihsiak hun a ni tawh a.Chu chu a hmei a pa­te hna a lo a ni ta.Chu fin-thiam hrang hrang zira intlansiakna-a tel chu “A Ruh No No Chhuak-ah” tia au vak vak kan hun-tawngin min phut a ni a.Mizote pawh he khawvelah nung dama nunkhua hman ve kan duh chuan kan tel ve ngei ngei a tul.

Meter bithliah awm lova intlansiakna fin-thiam zira tlan tunlai kan hmeichhiate hi em(ping) nen ram hnuai lama thungphur tura chhungkaw tan fehchhuak hmanlai Mizo hmeichhiate nen ka tehkhin thin.

Ni 12 March (Chawlhni), Malaysia Mizo Kristian Insuihkhawm Pawl-ah ka zu inkhawm ve a.Chutah chuan Switzerland rama emping nena thing phur,Jermany,Singapore,Thailand,Norway adt.(?) rama unaute kan kualtu,a thing phurhna em nena Malaysia unaute rawn tlawhtu Mizo nula thuchah tawi ka ngaithla a.Vanneihthlak tak maiin, inkhawm banah chaw eipuina hun leh hmun fan kuala thlalak-puina hun tha ka chang hlauh mai a.Hun tui-luangin a len nel nel keia tan chuan hriatreng  tlak a ni tak zet.

Mizo nula em(ping) nen vak chhuak ka hriat ve zingah chuan tuna ka sawi,amah Lalhlimpuii hi a vak thui ber pawl a ni awm e.Hawh u, midangte pawh hian fin-thiam zir hi uarin, changkanna lamthuam zawh vut vut ang u khai.”Hmasawnna panna lamthuampui-ah tlanchak lam speed limit a awm lo” tih a nih kha maw...

* Zotui Thiang chuan Lalhlimpuii interview a nei mek a, thlalak dang chu chumi kan tarlan hunah ka rawn ti dawn nia.