Lunglei Bula Airport Siam Tur Resolution Pass

Lunglei South bialtu Pu S.Laldingliana, Parliamentary Secretary ni bawkin Mizoram Assembly-a Private Member’s Resolution a putluh "Chhimbial mipuite harsatna sukiang tura Lunglei bula Airfield siam a nih theih nana hma lak a ni ta hi lamawm kan ti a. Airfield hi siam thuai a nih theih nan sawrkar laipuiah nawr zel ni rawh se" tih chu ningani khan sawihoa lungrual taka pass a ni.

He resiolution sawihonaa member telte chu ruling an ni emaw, opposition an ni emaw, an lung a rual hle a, tumahin a hnial zawngin an sawi lo a ni. Pu P.P.Thawla phei chuan zaah 120-in a thlawp thu a sawi a ni. Chief Minister Pu Lal Thanhawla chuan tunah he Airfield emaw Airport emaw atan hian sum ruahman sa awm loh mah se, a awm ang angin a kawngte lo siam lawk a ni ang a ti a. 3th Finance Commission award-ah la tel hman lo mah se DoNER leh Planning Commission lam atangte pawhin nawr dan a la awm theih tur thu a sawi a ni.

He Lunglei bula Airfield/Airport siamna tur hmun hi Airport Authority of India atangin mi thiamte chuan an en tawh a, mahse, a hmun takah chuan kawng a la awm loh avangin an kal thei lo a ni.

Mizoram Assembly leh parliament-ah pawh sitting laia zirtawpni apiang hi Private Member’s Resolution ngaihtuah nana hman a ni thin a. Nimin piah ningania Mizoram Assembly-in Private member’s Resolution an ngaihtuahna chhan hi sitting lai March ni 19-ah Private Member’s Resolution ngaihtuah loa budget pharh a nih avangin khami ai kha nimin piahah kha Private Member’s Resolution ngaihtuah nan an hmang a ni.