Global warming, climate change kan buaipui luih luih lai leh fur ruahtui tlak dawn mek laia ‘Lo kan hal zel dawn’ han tih te chu a zahthlak mang e! Ni e, gospel centenary kan hman hnu thangkhat liam dawn tawhah pawh Lo kan la hal tlat si alawm.
NLUP kum sawm chuang min kalpui a, chumi hnuah MIP (Mipui Intihderna Project?) hmangin kum sawm min hrual rethei leh a, tunah ‘NLUP |hami’ Zoramah kan cheng leh mek. Chuti chung chuan Lo kan hal zel dawn tih hi sawi a la ngai fo. Kum za nufa Mizoram hi a dinna ngaiah a la ding reng.
Khawnge kan mithiamte
Hming tawpah Ph.D, hming bulah Dr. sorkar hnathawkah eng Officer-cer emaw kan tam mai. Ziak leh chhiar thiam tamna state, Mizo kan ni kan hmel a tha kan tum a sâng bawk si, hnam hlim thei kan ni. Cheraw-ah world record kan siam, Island of Peace te kan in ti vel, mahse kan in hmangaih siak Mizoram hi a tamchhawl tlat si. Mithiam kan ngah, kan thiamna chu sorkara hlawh hmuh nan chauh kan hmang emaw tih mai tur a ni rih. Vairam-pura zirchhuak thiamna sâng tak tak neite u, in thiamna hi kan ram leilung hne rem zawnga herrem dan in zir tel em? Inthiamna hi Zoram tan in hmang vat lo a nih ngat chuan Lo kan hal zel dawn, kan kanghlum thak mai ang. Khawpuia chengte pawh kan ur hlum tho ang che u, nuam in sa bik hauh lo ang. Chu hun chu thleng lo hram se.
Ram sik leh sa tha kan nei chunga ei leh bara kan intodelh lo a nih chuan Agriculture leh a kaihhnawih department mithiamte hi zak tur an ni. Kan thlai thar sawhthing leh a dangte man man zawka hralhna kan hre lova, kan dah tawih tawh thin a nih chuan Trade & Commerce Department hian zahna chang a hre tur a ni. Engvangin, hlawh neiin mithiam kan ruai che u alawm. Ram a kang chum chum a nih chuan kan Chief Minister tha chhangdawltu meuh Chairman-na, State Level Fire Prevention Committee hi a hlawhchham fai thak tih pawm mai tur.
Ram kang hi Dawhkan Committee a sawi fel chi a ni lo tih pawh kan hriat phal a hun tawh. Engtin nge kan tih ang? Khua leh veng tin hian ram kan (kang) duhna bik, Fire Prone Area (FPAs) kan nei vek. Entirnan Durtlang kham hnuai kumtin a kang ziah. Hengte veng tur chuan Dawhkan Committee piah lamah FPAs bul hnaia ram neitu kha a vengtu atan hlawh neia chhawr mai tur. A veng hneh lo a nih chuan amah kha hrem tur. Forest department mi tlemte hlawh neia kan chhawr hi an indaih lo a ni. Sawitel hram teh ang, tun kumtir khan kan Mizo zaithiam te leh a tuipuitute pawl din, Green Mizoram Network chuan ram kang chungchangah mipui zirtira fehchhuak turin sorkarah rawtna an thehlut a, a tawi zawngin ‘rem an ti lo.’ Sadden Muanga thu khawchang "Mak thei ngei.!"
Shillong khawpuiah Taxi chhunga meizial zu man an nih chuan a zutu ni lovin Taxi driver khan Rs 500/- chawi a ngai, chumi awmzia chu meizial zu vengtu atan taxi driver kha danin a ruat hmiah mai a ni, rem an hre hle. Chutiang deuh bawk chuan ram kang vengtu atan a bul hnaia ram neitu mawhphurna pek thiam a sawt khawp ang.
Mizoram hi
Garden Colony hun lai atang tawhin ‘Ching rawh u...’ tihna ram, thar chhuah hralhna tur kawhhmuh thei leh si lo mithiam inti tamna ram. Tung ching rawh u min ti, kan ching a, kan hlawhtling, ‘Thing anchhedawng’ min tih sak zui. New Land Use Policy an tih mek mek laia Buhdengkhawl, Auto-Rickshow, Ar vulh, Bawng vulh trade thlanna ram. A pawi lo, a tha tho e. Kan vulh a, kan ching a, hnam taima Mizote hian ram hruaitute thu kan awih a, kan hlawhtling zel. Mahse a hralhna hi Bagha leh Bangladesh kal tlang lovin kan hotute hian kum sawmhnih chuang zet chu min la zawn hmuh sak ta chuang lo a nih hi. Kumtharah pawh Lo kan la hal zel dawn.
A hralhna tur kan hre lo tak zet maw?
Kan thlai thar ram pawnah hralhna tur kan hre lo tak zet nge sum siam nan kuthnathawktute kan hmang? NLUP |hami cheng nuai engzat pawh sem raw na sek sek, kan hotute hian kan thawhrah hralhna vawiin thlengin an la hre duh ta chuang lo fo. A chi leina, a chinna, a thlawna sem tur cheng khat pawh hmuh let tur awm lo nuai za tel budget-ah an dah theih laiin kan thawhrah leina tur ‘a theih loh’ han tih tlat mai chu hmangaihna mak, mawi leh duhawm chu a ni lo chiang. Ram hmangaih, a chhunga chengte hmangaih tel lohna ram kan ni. Thlaithar hralhna hre lo ram Work Record te pawh hi siam leh law law ila, danglam fu ang! A senso atan cheng nuai engemawzat hmang leh ila. Kan inhmeh ngawt ang!
Mahse i beidawng lo ang u, beidawng hman kan ni lo, beidawnna hi setana hmanrua a ni. Mizo kan ni kan hmel a tha, kan thiam a sang bawk si, tih hi tun hun atan a ni. Kan thalai lehkhathiamte hian kan thar chhuah hralhna an hria. Mizoram sorkar hian a hre duh lo tak zet a nih ngat chuan Mizo thalaite nuih a za khawp ang. Khawvelin a hria ang tih hlauhawm khawpa thil nuih zatthlak a ni.
Computer an hmet kheuh ang a, minute reilote-ah khawvel pumpui thlai thar lei duh address kimchang kan thalaite hian an hria. Chung zingah chuan Sundar Ali tih te, Bangladesh tih te, Myanmar tih te hi an lang ve lem lo. Bagha Vai (bhai) kaltlang kher lova thlaithar hralhna hi Mizo thalaite hian an hria. Kan thawhrah man man zawka kan hralh theih hunah chuan ram thar zuanin kumtin ‘Lo kan hal tawh dawn lo.’
Thulakna: Vanglaini
Date | 16/04/2010 |
By | vallungleng |
Subject | khawnge mipui hmangaih tu |
ram kan vei a mipui e rawh kan vei tel silo eirukna dawhkan kilah tuktin tawngtai thul chuang silo kan van tam tawh tak em. engtin nge mireh thei te hian zoram khawvar hun hi kan nghak hlel sawrkar kan in thlangthar a mipui chuan rilru tharin kan nghak thian beisei bo mireh thei chanpual eiruk sak mireh thei te hmusit leh nghal bawk kan van tam tawh tak em rorelna dik a awm hun chuan lokan hal tawh lo ang loahl reng hi kan ning tawh a kut dur phuang mai lo vah hi kan ning tawh thosi vangvat kai reng pawh kan peih tawh lo chu vang chuan ram nge i hmangaih mipui te kan thlaithar te kha khawiah nge a awm a. tawiral in leiah a lung ral leh thianna
engtin nge hmalam kan pen theihte lul ang mithiamin tih te chuan ram ni loin mipui hmangaih phawt u lang chuan kan ram chu a dam zawk tawh dawnna ram vei mipui kan vei lo chuan ram a thang chuang lo ang khawvel ram in hawi ang ram thang duang ramte kan thlir chuan mipui an ngai pawi mawh hmasa chuan ram chu thang mai a chu tiangtur chuan i ngaituahna seng rawh le;