Lianchhiari Lunglen Tlang hi Mizo zingah chuan hre lo kan awm tlem viau awm e. Lianchhiar hi Dungtlang lal fanu a ni a, hnam chawm tlangval Chawngfianga nen an inngaizawng a,kara biahthu dawt leng (an palai Mangmuaia vang)-in Chawngfianga te chu Chhingzawl-ah an pem ta a.Lianchhiari chu a lungleng thin em em mai a, a hnuaia tlang atang hian Chawngfianga a thlir veuh veuh thin.Dungtlang khua a awm Liangchhiari Lunglen Tlang hian Mizote rilru-ah engtin emaw tak hian nghawng a nei ni ngei tur a ni - vawiin thleng hian theihtawpa humhalh a ni a, miten an tlawh huai huai thin.
Ka lunglen em em changa kan piah lawk tlang ka han chuan chang te hian, chhawrthla eng hnuaia - ke thiaha Lianchhiari lungleng taka Chawngfianga ngaia a vak leuh leuh chu ka mitthla-ah a lang thin.
He hla hi han ngaithla ve phawt mai teh le...
LIANCHHIAR KA DEM LO CHE
-Lalrempuia
Hmasang Lianchhiar, lal fanu hmeltha
Vang khawtlang rel pawh
Dawn zo lova suihlunglenga
I Di tuanna vangkhua i thlir kha
Lianchhiar ka dem lo che, a lo na em a ni Di zun ngaih hi
Kei pawh nangmah iangin vangkhaw hmun loh
Di zun ngaiin lenrual zingah ka thang vel
Min hnemtu aw ka ngai vawng vawng
Ngaihlai lungrun,kan lenna vangkhua
Hmun lo mahse kan tiam rinawmna
Vawng dun zel ang aw
Run hmun kan len dun ve nan aw
*Hla thu hi dik lo leh felhlel deuh a awm ngei ang. A dik hria kana wm chuan min siam thatsak nghal ula, a tha ang e.
Hla MP3 download duh tan - Lianchhiar Ka Dem Lo Che by Lalrempuia.mp3 (4,6 MB)
Zothlifim-a Thuamtea Khawlhring ziak hlahril - Lianchhiari leh Chawngfianga (Ballad) pawh kan rawn tarlang tel nghal a, tin hlahril (poetry), Ballad ziak dan pawh kan rawn tarlang law law e.
Duhlai chawngfiang sakhming than nan,
Tukram vau hmawng a sang;
A ngur chawi-hrai Lianchhiar hellai,
Tukrel chem-hnam a hrang.
Lawhleng a nui suihlung an rual,
Sawmfang sakthlam an lawi;
A tlang leh mual hlim zai an vawr,
Sakruang zetial an chawi.
Zaleng an sawm an run an kai,
A zua talhkhuang a chawi;
Chawnban an hmer thu di an hlan,
Lianchhiar sakhmel a mawi.
Mahse duhluat tihluat a pawi,
A zua sakhming than lai;
Lenkawl a bang tur ni a her,
Zatlang relthang an kai.
Khuan mawi ang dim tura'n an rel,
Rem run dawhsang kai zai;
Lamkar palai an tir mahse
An hlan dawtleng biahzai.
Chhuihfiang sum-tual-khual-ral an chhal,
Lianchhiar tahkhua a sei;
Phun hmawng ang tluang zamual a pem,
Suihlung vaih khua a sei.
Zunleng a ngai chhuahtlang a thlir,
Chhimtlang hmartlang a deng;
Zun zai a zam tahzai a rel,
Ariang suihlung a leng.
Pawngthang mi u tha val nunnem,
Vawn tang zun ai a cham;
Dawh run a lawi nuthai atan,
Chhuihfiang zunleng a cham.
Sakhming sawi ni a bang thei lo'ng,
Nunhlui ngiah khua a sei;
Dawntuai fanau chawi rel mahse,
Chhuihfiang zunleng a vei.
Beh thu a zuar tin khua a hrut,
Chhuihfiang pheilai a vawr;
Lianchhiar sumtual a kai sakhmel
Intawng hlimzai an vawr.
Tawhnan khawnthiang bilhzu an dawn,
Zaleng an ngai love;
Khumzawla kai Pawngthang zan mu
Chhinzai a rel love!
Bawar a pau tlaikhua an var,
Chhuihthang zamual a liam;
Kumtluang 'rawhmual khawnbawl tura'n
Lianchhiar biahzai a tiam.
Sangal an khawng lamtual khat leng,
Awih nau an chawiza e;
Tlaini an leng hlim lai a par,
Vangkhua an lengdun e.
(He Poetry hi Ballad nihphung leh phuah dan kalhmang hre lova chhiar liam puatah chuan a ho viauvin a lang mai thei.Ballad chu thawnthu hla a ni ber a,hmanlai thawnthu hlaa puanchhuahna ang hci hi a ni kan ti thei ang.Ballad-ah chuan a phuahtuin a rilru,a duhdan leh ngaihtuahna a zep tel thiang lova,a duh dan danin kha a thawnthu phuahchhana kha a siksawi thiang lo.
A phuah dan kalhmang erawh 'quatrains'an tih,chang khata tlar li awm chiin an phuah tlangpui a.Tlar tina thu awm zat chu lam riat leh lam ruk a inkarthlak thin.A inkarthlak han tih hian ,tlar khatna kha thu mal lam riatin lo phuah ta la,tlar hnihna chu thu mal lam ruk ngei ngei tur tihna a ni chuang lo.Sapho chuan lam riat hlira a hmasa tlar thum phuah phawt a,a thlar tawpber tlar lina chuah chu lam ruka phuah an ching khawp mai.
Ballad hi duh duh dana phauh nawk nawk theih a ni lova, tihdanphung khrihkhan tak min phuar tlattu a la awm a.Chu'ng phuahdanphung khirhkhan takte chu 'metrical verse' leh 'rhyme scheme'-te hi an ni.Metrical verse-a Poetry phuah tur chuan 'stress syllable' leh 'unstress syllable' hriat hran phawt a ngai.Mizo tawnga Poetry phuah ve tumte tan chuan 'ri sang ' leh 'ri hniam' tiin hmang ila,a dik mai awm e.
Heng syllable ri sang leh ri hniamte hi a inkarthlaka mawi tak leh remtaka hman a ngai .....
Lawhle'ng / a nu'i / suihlu'ng / an ru'al
Sawmfa'ng / sakthla'm / an law'i
A tla'ng / elh mu'al / hlimza'i / an vaw'r
Sakru'ang / zeti'al / an cha'wi
A daidanna kan siam kar a mi khi Syllable pahnih zel a ni.
Tunah chuan 'rhyme scheme'chungchang lo sawi ve leh thung ila.Ballad rhyme scheme chu "a b c b" a nih laiin , ballad phuahtu tak takin hei hi an zui lem lova, a b b a te, a b a a te leh a dang te pawh an hmang bawk thin.
Zunleng a nai chhuahtlang a thlir ,.....a
Chhimtlang hmartlang a deng ;.......b
Zun zai a zam tahzai a rel , ......c
Ariang suihlung a leng. .....b)
A tlar khatna atangin "a...b...c...d" tiin an chhiarthla zel a,mahse chu hla chu "a..b...c...d.." daih baka sei a nih chuan, chang hmasa ber "rhyme sheme " ang kha an hmang leh mai thin.)