Lei Mawina - Rokunga ( Hla Thlan )

He hla lar tak “LEI MAWINA ” phuahtu hi Mizo kan han inen a, kan nihna thalai ber min thlirtir tlattu,hreawm tinreng karah pawh Mizo nui hawr hawr min nihtir a, Mizo nih tinuamtu, Mizo thalaite hlim taka zaitirtu, “Poet of the Century” leh “Man of the Century” atana thlan, Mizo hnam pumpui ngaihsan leh ngainat em em Rokunga (1914 - 1969) phuah a ni. Rokunga hlate hi a Mizo reih mai a, sak a nuamin a hahdam a, hla thu harsa leh un pui pui a hmang ngai lova, mahse thu rill eh khun, thuk tak tak a paipawn kuh tul lawi si a ni.

Pathian thil siam, Amah pawhin a han ena tha a tih em em, he kan chenna khawvel mawizia Rokunga’n heti taka a han puangchhuak thiam hi chu Zofate tan ro hlu a tling a, mawlsawmna kan dawn tam tak zinga pakhat chu a ni ve ngei ang.Ni tina kan hmuh leh kan tawn, mahse a ngaihna kan hriat hauh si loh chu kan hmuh loh phen atanga a hmuh ruk khiau, Siamtu kuchhuak mawizia leh ropuizia he hla-ah a a fiah hle a ni.

Aw khawvel puan anga chul tur hi,                               

Tinkim dawnin han thlir ila;

Aw hringnun par anga vul thin hi,

Hma te’n zamual a liam tur chu.

Thunawn

Aw lei mawina thinlai tihlimtu,

Zantiang chhawrthla leh si-ar eng mawi,

Aw, zing eng mawi leh tlaitla eng mawi,

Damlai khuavel nunkhua ti nuama’n lo vul rawh.

Tlangsang thing zar mawi leh phai zawla,

Suang lungpui leh luipui luang ri;

Vanrang chhum leh thlifim leng velin,

Khawvel mawi hi hla mawi an pe.

Khua thal lenkawl ni chhuak eng rii riai,

Tuahpui par leh Vau, Phunchawng par;

Chungtiang lenthiam Kawlngo thla khawng ri,

Lei rawngbawl kum siam an lo ni.

I mawi mang e, piallei kan chenna,

Rianghlei tan par ang vul leh la;

Tah lai ni kawlkungah liam zelin,

Hlim lai ni par ang vul rawh se.

Lei Mawina by Rokunga MP3 (Download duh tan) - Lei Mawina by Rokunga.mp3 (4,1 MB)

(He hla rawn thlangtu Zartea (lalzarzovazt@gmail.com) chungah kan lawm takzet a, midang pawh hla rawn thlang zel turin kan sawm nghal e. Ed.)