Larsap-in Tlawmngai Pawl Hrang Hrangte Kawm

Mizoram Larsap Lt.Gen (Rtd) MM Lakhera, PVSM, AVSM, VSM chuan Mizo khawtlang leh mimal nun tlahniam zel siam that dan tur leh zirna sang zawka thawk tur mithiam leh tling te lak an nih zel theih dan tur sawiho turin nimin chhun khan Raj Bhavan-ah tlawmngai pawl hrang hrang hruaitute a kawm a, hetah hian tlawmngai pawl hrang hrang MUP, MHIP, CYMA, MSU and MZP hruaitute an tel tha hle a ni.

Larsap chuan tunhnaia Mizoram chhunga hmeichhiate chunga hleilenna thleng tam chu a vei thu sawiin  a bik takin kumtlinglo pawngsual thawm ri a awm ta fo chu pawi a tih thu a sawi a, hei hi ngaihmawhawm tak anih avangin a pumpelh dan zawn a tul a, Mizote hi khawtlang nunah inpawh tlang tak kan nih avangin leh tangrual thiam hnam kan nih avangin he harsatna hi kan vei tlan a rilru hmunkhat kan put phawt chuan kan hneh thei a ni a ti a. Mizo society-in sualna hrang hrang a do tlat chuan hnehna a hmuh ngei a rinthu Larsap chuan a sawi bawk. Meeting ah hian Mizoram a sualna tam zawk hi  hmun dang atanga lo pem te tih thin anih thute sawi a ni a, hemi inven nana Aizawl a YMA branch tin ten Foreigner Registration an buatsaih chu a lawmawm a, hetiang registration hi thingtlangah tih thuai anih tur thute sawiho a ni. Governor chuan tlawmngai pawlte chu khawtlang nun siamthatna kawnga inzirtirna pe zel turin achah bawk a ni.

Governor chuan Mizoram chu ziak leh chhiar ah sang ber pahnihna nimah ila, hei hi a tawk lova, kan naupangte leh zirlaiten India leh khawvel hmun hrang hrang a inelna hmachhawn tur chuan  a bika thiamna neih a ngai a ni tiin hetah hian Mizoram University hi a pawimawh a ni a ti. Mizoram University hi ram ro anga ngai turin Governor chuan a chah a, zirtirtu lak chuangchangah pawh a thiam lak a tul thu a sawi. Governor chuan MZU Registrar hmun ruak mai tur hnawhkhah nan tunthlengin Mizo  hming pakhat mah a la hmuh loh thu a  sawi lang a. - DIPR