Kum 2003-09 chhungin Mizoramah Naupang pawngsual tum 536 thleng

Social Welfare department leh Human Rights & Law Network (HR&LN) tangkawpte chuan Mizorama mipat hmeichhiatna thila naupang khawih chingpen chungchang zirhona an buatsaih. Kum 2003 - 2009 chhung khan Mizoramah hmeichhe naupang khuaikhem  vawi 536 a thlenga chhinchhiah a ni.

Inkhawm kaihruaitu Social Welfare Director B Sairengpuii chuan, Mizo naupangte'n suahsualna chi hrang hrang an hmelhriat tam tâk thu sawiin, naupang khuaikhem chíngte pawh an pun tâk thu a sawi.

Pachhunga University College-a Asst. Professor, Rohmingmawii chuan, kum 2003 leh 2009 inkara Mizorama naupang pawngsual leh khuaikhem tâwkte chanchin zirchiannate hrilhfiahin, an kalpui dan leh an thil hmuhchhuahte a tarlang a, naupang khuaikhem leh a ven dan turte an sawiho nghal a ni.

Police (CID), District Police, CWC leh MHIP-in an chhinchhiah danin, kum 2003 atanga October 2009 thleng khan Mizoramah hmeichhe naupang pawngsual thubuai 536 ziahluh a ni.

Pawngsual tâwktu naupangte zingah hian pawngsual tâwk nawn an awm nual a; case study an neih 61 zinga 53-te chuan pawngsual an tawk nawn a, a pawngsualtute pawh mi ngai an ni tlangpui. Hetih lai hian, kum 2005-2009 chhung khan Mizorama mipa naupang khuaikhem thubuai 12 a awm niin CID-te chuan an chhinchhiah bawk. Pawngsual tâwktu naupangte hian enkawl zuina an dawng lem loa tarlan a ni.

PUC-a Asst. Professor, Rohmingmawii zirbingna atanga a lan danin, naupang kum 5-18 inkarte zahmawh film an en tawh em, tih a zawhna chhangtu naupang 595 zinga 55.78% chuan an en tawh thu an sawi a. Chu'ng zahmawh film en tawhtu naupangte zinga 36% chu anmahni in ngeia en an ni a, 64% chu mi dang ina en an ni. Middle school zirlai, kum 13 hnuai lam zinga 34.25%-in zahmawh film an en tawh tih tarlan a ni bawk.

He zirhona hunah hian Mizoram Women Commission Chairperson, Rozami, Social Welfare, Police, Prison, Education, kohhran leh MHIP aiawhte leh Human Rights & Law Network hruaitute an tel a ni.

Thulakna: Vanglaini