KTP General Conference Mamit-ah i kal dawn em?

MIZO AW : Mizorama thalai khawmpui lian ber KTP General Conference lam i thlur daih teh ang. March 4-7 chhungin Mamit-ah neih a ni dawn a, thlengtu lam inbuatsaihna a fel thawkhat tawh a, kal tum an inbuatsaih mek a, vawiin lam hi chuan khaw hla deuh chu an chhuak tan tawh ang a, naktuk leh ninganiah khawmpui palai tam zawkten Mamit an lut ang.

Pandal engtia lian nge?

General Conference neih a nih reng rengin khawmpui neihna tur Pandal hi hmun pawimawh ber a ni tawp mai. Pandal len zawng, sak dan phung leh chei danahte pawh inelna a nasa thin a, tlin chinah mawi theihtawpa sak chu thlengtute tum ber a ni. Tun tum Conference-a Pandal nghahna hmun hi GSA Play Ground-ah a ni a, a dung Ft. 332 a sei Ft. 165 zau leh stage Ft 60 x 32 a zau niin a chhungah palai 15000 vel inkhung thei tura ruahman a ni. He inkhawmpui atana Pandal Structure hi Mizoram Synod ta a ni a, Mamit a phurhthlak nan Truck 20 hmangin Rs 150000 (Nuaikhat Singnga) sen a ni. Chhangte Steel Fabrication chuan Rs 240000 (Nuaihnih singli) in a remkhawm hna an thawk a, hnatlang tha pawh seng hnem hle tura ngaih a ni.

Kal turte tana hriat tur pawimawh

A pawimawh tak zet. Kal tum tana hriat tur tul tam tak a awm a, kan inhrilh seng lo hial zawk ang.

Motor keng tur tan

Mizoram khaw hrang hrang, chhim tawp atanga hmar tawp thlengin he hmun pan hian motor an inzui lut duah duah tan mek a, mahni veng motor hman tawmpui lova mahnia motor inhawlchhuak tam tak an awm ang. Motor te (LMV) keng tan Medical Complex, Ngharpet Veng (No Vehicle Zone) leh Luangpawl Veng inkar zawng LMV hmanga inkhawm duhte chu P.W.D atanga chhuah lam (main Road) ah tlan zelin SSA Hostel kawt ah an tawp ang. A bak an pel thei dawn lo a, an in turn nghal ang a, haw lam pawh an kawng ngaiah bawk an tlan kir leh ang. Chhim lam atang thoin Bus a service dawn a, Luangpawl veng leh Medical Complex inkarah Bus Service tir a ni ang a, P.W.D Complex kawng chungah tlanin Damdawi In tlan kualin an tlanna ngai ah an tlan kir leh thin ang. Bus Fare hi khawi atang pawhin chuang se Rs 5/- zel a ni dawn a, bus fare tur Rs.5/- inrig lawk rawh. Tin, Khawchhak leh Khawthlang lirthei reng reng chu One Way-in Ngharpet kawng ah an tlan vek ang a, Chhim lama Taxi Service tur te chu Damdawi In Canteen Kawt phei ah an ding ang a, Bus service tlan dan ang chiah in an tlan bawk ang.

Hmar lam atanga motor chet d an tur chu hetiang hi a ni bawk. Vengthar atanga Hmar lam Bethel veng a thleng LMV leh Two Wheeler zawng zawng chu Vaubekawn chhuahlam leh tlaklam Link Road ah an tlan ang a, Vehicle Stop ah an tawp ang a, Motor dang tlanna dal lovin an motor an dah ang. An tlanna ngai ah bawk an tlan kir leh thei ang.

Venghlun atanga LMV leh Two Wheeler reng reng chu Charkawn atangin Bazar Veng ah Bus Service tlan dan ang thoin an tlan ang a, No Vehicle Zone H/S Veng junction ah kualin H/S Veng leh Hmunsam inkarah kawngpui sir, a rem chang lai ah Bus tlanna ti buai lo tur in an Park ang.

Bethel Veng leh SSA Office No Vehicle Zone inkarah Bus Service tir a ni ang a, Bethel Veng leh Mangkhawngdai Field atangin Khawpui chhung kawngpui main road zelah tlanin SSA Office Dropping Zone ah Hmunsam lam kawngpuiah kual lehin Hmunsam Biak In bul ah pengin Upa R.Vanlalsiama In ah a chhuak leh ang a, Kawngpui pangngai zawh zelin, Mizoveng kawngpui chho zawhin Industry Road ah peng lehin Vengtharah Pu Zorimawia kawt ah chhuak leh in Kawngpui Pangngai(Main Road) zawhin an rawn tlan chhuahna lam an pan leh ang. Bus chuan man (fare) hi Bethel veng leh Dropping Zone Inkar Rs 10/- a ni ang a, Vengthar atanga Dropping Zone Rs 5/- a ni ang. He mi huam chhung a chuang reng reng chu khawi atang pawhin chuang se Rate siam ang hi an pe kim tur a ni ang.

Hmar lama Taxi Service tur te chu Pu Vanlalthawma Pachuau Kawt phei ah an ding ang a, Bus service tlan dan ang chiah in an tlan ang.

Motor chesawn lo tur ( Bus/Truck etc) chi reng reng chu Mangkhawngdai Field leh Luangpawl Field ah dah (Park) vek tur. Tul bik thil Damlo phur, Tui Chawi leh tul dang thil ah chuan Special Permit Pek chhuah a ni ang.

Zing lamah Dar 7:00 thleng inkalpawh theih hun siam a ni a, zan lamah Dar 10:30 Pm atangin hawn a ni bawk ang. Mamit road map siam zawh tawh a ni a, hei hi khawlaiah te pawh an tarchhuak dawn a ni.

Mobile Phone

Palai tin deuhthawin an keng ang. Leilung pian hnuah Mamit-a Mobile Phone tam ber tum a thleng dawn a, hengte hi Mamit-ah signal tha tak a awm thei vek. Airtel hi counter 13 atanga hmar lamah duhthusamin a tha a, signal-ah buaina tur a awm lo ang. Aircel, BSNL, Reliance etc te pawh Pandal leh a bul velah a hmantlak thawkhat a, heta tang hian i inringlawk thiam mai dawn nia.

Hriat tur tul dang

* Mamit khua hi a phai ang reng a, Luipui karcheh a awm a nih bawk avangin Malaria a hlauhawm a, thosilen tha tawk tak ken theihnghilh loh tur. March thla kan kai tawh a, khua a vawh tawh lem loh a vangin mutbu ken duham lutuk chi a ni lo ang.

* Mamit khua hi khaw dungsei tak mai a ni a, Pandal sakana hmun hi khaw tawntirh lam deuh a ni a, Pandal atanga Counter hla ber Counter No 18 (Mangkhawngdai field) hi Km - 4 vel a ni a. Counter No 15 chin hnunglam ho tan chuan Motor a inkhawm a ngai dawn tihna a ni.

* Mikhual buk deuhnaah inthiarna a in daih dawn lo tih hriat lawk tur. Mizo ekin an siamchawp a, tam tak tan inthiar a harsa mai thei a, hetiang huam hian kal a ngai.

* Tui harsatna hmun nia sawi \hin ni mahse tunah chuan sawrkar hmalakna avangin an ziaawm hle tawh a, an harsatna zualpui sutkian a nih tawh avangin inthlahrung lutuk duh suh.

* I thlen inte kha Presbyterian Kohhran an ni lo mai thei a, mahse a khawpuma an tanrual avangin kohhran hrang tih velah buaina tur a awm lo ang. Mikhual engzah pawh thleng thei turin chhungtin an inhuam a ni ber mai a, i beisei leh rin aia nasa fein an lo chhawn tha ang che.

* Nuam tawlna hun a ni lova, zu rui mi tan hmun a awm hek lo ang. Sahawk tur leh helam rilru pua a khawmpui hman tum chi a ni lo. Nagmah bakah i chhungkua, i khua leh vengte kha i ti mualpho palh ang e.

* Khawmpuiin a tum ber chu thlarau lama hlawkna a ni. Khawmpui rorel inkhawmin pawimawh leh tul a rel fel ang a, mipui nawlpui chanvo chu thataka inkhawm leh kan thlarau chante in share tawn a ni.

Khawmpui hlawk taka hmang turin palaite Thalaite Aw in duhsakna a hlan a che u.