Kristian-te Zawlbuk

- Lalchhawnzova

Hman lai kan Pi leh Pu-te hunah khan ziak leh chhiar thiam lo mahse Zawlbuk kha thangthar zelte tana rochun zel tur huaisenna te, taimakna te, rinawmna te, tuarchhelna te, kuthnathawh hlutna te, tlawmngaihna nun leh nun dan mawite an inzirtirin an infuihna hmun a nih avangin Mizo University ropui tak a ni kan ti thei ang. Chuvangin, Zawlbuk hian Mizo nunah hmun a chang thuk hle a ni.

Kan Pi leh Pu-te Kristian an nih hnu leh an khawsak dan rawn changkang chho zel avangtein Zawlbuk kha tul tawh lo tiin a ding tawh lo a ni thei. Mahse, Zawlbuk hi a in tak ding tawh lo mah sela, Zofate thinlungah erawh chuan a bo thei lova, engtikah mah a reh hlen tak tak thei dawn lo. Khawtlang leh mipui, mi rethei leh chanhai te tana a tangkaizia te, Mizo nun mawi tak tlawmngaihna chhawm nungtu a nih dan chen hian hriat reng a hlawh kumkhua ngei ang. Tun lai Kristian-te hi chuan kan Thlarau nun, nun dan ka inzirtirna leh kan inpawlhona chu Biak In a nih avangin Kristian-te Zawlbuk kan ti ve thei ngei ang.

A nih leh, Kristian-te Zawlbuk ai hian hmanlai Zawlbuka an inzirtirna leh nunphung kha a duhawm zawk ang em? I ngaihtuah chiang ang u. Kan khawlai nun leh khawsak dante han thlir hian kan inzirtirna leh kan inkaihhruai dan hi a tha tawk lo a ni thei ang em? Media hun kan thleng tawhin, internet khawvelah kan cheng a, kan khaw hawi leh hriat a changkang tawh kan ti zawk dawn em ni? Kan hmuh leh hriat a changkang kan tih rual hian kan nun a zalenin Kristian nun leh tlawmngaihna a tlak hniam phah lo maw?

Tunlai hi chuan Biak In kan inneih len siakin kan inneih ropui siak a, a chhunga chengte chu kan thawl hle zawng chu a nih hi! Hman lai Zawlbuk kha chuan hnam nun a tipumkhat a, an tang rualin an nun a mawi em em thin a ni. Tunlai Zawlbuk hunah hi chuan pumkhat nunhona kan inzirtir laiin kan darh tual tual a, Isua Krista hmangaihna kan inhrilh laiin kan iner thum a, inpekzawhna leh rinawmna nun kan infuih mek laiin mite nunpui atan kan duh lek a, thlamuanna leh thlarau nun kan inchah mek laiin mahni hmasialnain kan khat theuh chu a nih ber hi! Chuvangin, sawi lova awm thei lo, nunpui harsat tak Kristian-te hian inbih chiangin hman lai Zawlbuk nun kha i zir ang u.

Kan Kristianna te hi hlonuar ang mai kan ni ta! Pastor nawrh ching, Kohhran Upa tihtauh ching kan ni nuk tawh. Kohhran Upa leh Hruaitu nih avanga mahni duh dan leh ngaih dana kaltir talh tum, mahni vuavangte an fel vang leh tlin vang ni lova nihna chelhtir talh tum, nihna inchuh reng rengin kan inzuan siak a, Kohhran rim a tichhia a, hnam nun intihbingna a awm phah thin. Kohhran a rim chhiat tawh chuan Mizo Society nun thlengin a nghawng a, inlungrualna leh thawhhona nun a chuai a, a pawi em em a ni.

Hman lai Zawlbuk Upa-ten thalai leh naupangte an fuihna leh zirtirnate kha a takin an nunpui nghal a, fel lo leh che mawi lo, mite aia tlawmngai lo bik nih an hlau a, aia upa te an zah thiamin an chhawmdawl thin. Keini Zawlbuk infuihna leh zirtirna atang hi chuan a Van kawk zawng hlirin kan inzirtir a, kan Kristian nun inzirtirna te hian hling a nei tawh lo maw! Krista nun aiin kan mihringpuite nun hmuh fiah kan tum a,Pathian thu kan inhriatsiak a, nunpui turin kan intlansiak si lo. Hrilhfiahna leh chhuizauna lamah kan inau khum a, kan hrilhfiah leh chhui zau luatah kawng dik lo kan zawh phah thin, Mithiam sawi loh Thlarauin min pawl tih avangin Bible-te hi mahni duh dan danin ka inti hrilhfiah a, zirtirna dik lo bawkin min zui nghal a, a pawi hle a ni. Kan ka hi a Kristian lutuka kan rilru erawh chuan a zawmin a nunpui thei si lo. Pathian thu kan hriat thuk lutukna lamah kan chawlawl zo tawh a ang hle. Mite nunpui atana sawi chauh lovin mahni paw’n nunpui ila, mi tan ngaithla lovin mahni tan i ngaithla ang u. Chu mi hunah chuan nun nghet leh thlamuanna duhawm chu kan chang zawk ngei ang.

Sum leh pai avangte hian Kohhran a nghing dur dur a, innghirnghona a hring chhuak thin. Kohhran sum avangin inremna a chhu chat a, nihna leh sum kan tantlantir fo avang bawkin Krista hmel a hliah bo thin. Biak In chauhah hian em ni, kan Krista nun hi kan lantir dawn! Dollar lo hian Mizo kohhran hi a ding thei tho lo em ni?Dollar leh nihna duh avangin Kohhran a va pung chak em! Kohhran tam avangin kan Kristian nun a mawiin a nghet chu nise sawi a ngai kher lo tur, Kan sum lak luh leh sawma pakhat kan hlan hi a inmil meuh em? I ngaihtuah chiang ang u, Lal Isuan misual a hmangaih a, hnam a thlir hrang lova, Kohhran hruaitute chuan misual an haw thung a, chipuite duhsaknain an khat thin. Misualte tan Kristiante Zawlbukah lut ngam lovin Kohhran Upa fel tak takte’n an lo hnar a, hmangaiha zirtir aiin mi tha bawk an zirtir thin a ni. Chawimawitu nih tum lovin chawimawi an beisei fo. Kan Kristianna hi tlawmna nun ai mahin intihropuinaah kan lut mek niin a lang. Lungawi lo kal khawm ang mai vuina tur hlir kan zawng chu a nih hi!

Chungvangin, Krista nun leh mizia hi nunpui thei turin eng tin nge tan kan lak dawn! Bethlehem dai pawh la thleng lo, ral atanga suangtuahna nena tui taka zai thin Kristiante hian kan suangtuahna ramah kan cheng thuk lutuk a, a tak ram kan pawh pha tawh lo a ang hle mai. Pathian thu hi kan hre thuk lutuka kan nunpui seng lo a ni ber mai.

Ni, kan nunpui theih tur Pathian thu kan mamawh hle a ni. Naupang Sunday School Department tin atangin Isua chanchin leh “ duli bo, fapa tlan bo, beram bo ” tih ang rengte hi kan zir kum tin ziah. Lal Isua chanchin leh a tehkhin thute hi bo chuang si lovin Naupang Sunday School atangte hian hman lai Zawlbuk nuapang leh thalai an lo zirtir thin, taimakna te, rinawmna te, kuthnathawh hlutna te, huaisenna te, hriselna leh zirna lam te, tlawmngaihna hlutzia leh aia upa zah thiamna te hi zirtir ta ila, Mizo Society nun leh Kristianna hian hma a sawnin a zahawm zawk ang em? Kristiante Zawlbukah pawh hian hetiang thu tha tak tak hmang hian sermon ta ila, muthlu kan tlemin kan hlawkpui zawk lo ang maw? Kan nitin nun (hring nun) atanga kan inzirtir loh avang hian camping-in intipiangthar hle mah ila kan tlu leh thin a ni. Rinna leh chhamdamna chungchangah kan buai rei lutuk ta! Kan kal tumna theuh chu Van ram tho a nih kha! Thil tha tih i ning lo ang u.

Kan pi leh pu-te hun laia Zawlbuka an inzirtirna khan hnam nun a tipumkhatin khawtlang nun a timawi a, Mizo nun chher thatu leh chawikangtu a ni kan ti thei ang. An hmuh phak leh nun zia la hniam hle mah se, an chhungril nun a nghet em em a ni. Tunlai kan hnam nun chawikangtu, hnam rohlu chu Kristianna hi a ni a, Kristiante Zawlbuk (Biak In)-a kan inzirtirna hian mi tipumkhatin nun nghet kan nei phah em? Krista nun nen kan inmawi thei meuh em le?