Kei Tehin Enge Ka Chhar Ve Le?

“KL khawpui tual tleitir hi sang tam rual,

A tha an tam lunglai hnemtu ka tawng lo;

Ngaih loh leng an ni e leng ve si.”

tia tual ka mawina Malaysia, hringnun nghawngkawl ka bahna hmunah hian zirtirtu training-ah te, naupang enkawl dan zirna-ah te, naupangte dikna chanvo chungchang zirna-ahte ka tel ve zeuh zeuh tawh thin a. Chutiang hun apiang chuan ka naupan tet atanga ka lo puitlin chhoh dan – zirna  run bela hun ka lo hman dan leh ka zirna run belh veho te kha ngaihtuahna-ah a lo lang uaih uaih thin a.Ka zawh tak loh kawngte kha mitthlaah a lo lang chhuak leh thin.

Tum khat pawh naupangte dikna chanvo chungchang kan zir tumin, “ I fapa naupang chuan a sam zuah sei duh ta tlat sela, lu met tura i tih paw’n duhlo ta tlat mai sela, engtin nge i tih ang? ” tih zawhna hi a lo lang a. Chhan dan tur hriat harsa kan tih em em laiin, kan pi-nu Pastor Lucy-i chuan hetiang hian a rawn chhang hleuh nia mawle –“ Ka fapa chuan zirna skul a kal ngei dawn a, chu a zirna skul chuan dan leh dun fel tak a nei thlap ngei dawn a, chu a skul danin a phal leh phal loh azir a ni tawh ang chu” tiin.

Pastor Lucy-i chhanna hian vawiin thleng hian thil tam tak min ngaihtuah tir a, mi ramah zirna skul an ngaih pawimawhzia leh rinzia te, an zirna skul inzirtirna dan thatzia leh hlutziate mi ngaihtuah tir fo. Tichuan  ka zirchhuah vena ‘Vengchhak Skul / Bawngek Skul ’ an tih mai thin zirna run te ,No.2  B.E.H.S zirna run te leh ‘ Zawlkin Thiam Thang Run’ tia kan chawi Kalay University te kha ka dawnkir leh thin.

Napoleon-a mantu General chuan, “ Napoleon-a ka man theihna chu saw Skul tuala ka chhar saw a ni e,” tiin an Skul hmingthang Eton a kawk e, an lo ti a; kei teh hian ka zirna Skulah khan enge ka chhar ve a, enge ka zirchhuah ve? tiin ka la inzawt fo.