www.youtube.com/watch?v=yMXQ5ro8xOI
Vawiin (August ni 31, 2011) khan Kuala Lumpur BC Sanctury Hall-ah Malaysia Mizo 800 rual velin Mizo Day hlim takin an hmang. Malaysia Mizo Day-ah hian Mizo Christian Fellowship, Malaysia buatsaih lehkhabu “Kan Lenna Vangkhua” chu Lalchhanhima’n a tlangzarh a, mipuiin an hlutpui hle.
Lehkhabu tlangzarhtu Lalchhanhima chuan lehkhabu pawimawhzia sawiin, “Hnam hmasawn leh hmasawn lo tehfung pawimawh tak chu zirna leh thu leh hla a ni. Zirna in/zirna hmun ṭha leh ṭha lo tehna pawimawh tak chu lehkhabu ṭha neih tam leh neih tam lohah a ni a, thu leh hla lama hmasawna pawh lehkhabu aṭanga teh a ni ṭhin. Sakhaw hmasawn leh hmasawn lo tehna pawh Lehkhabu darh zau leh darh zau lohah a ni.
Vawiina Mizote hi hman aṭang tawh khan zirna leh thu leh hla lamah hma lo sawn tawhin, lehkhabu lo nei tawh ni ila, hnam lian leh chak ve tak kan nih ve ngei a rinawm. Lehkhabu kan neih har avangin kan ṭobul chanchin a fiah lo ruai a, fiah lo taka kan chhui hlat theih ber chu ‘Khampat’ chanchin a ni. ‘Khampat’ hma lam chanchin reng reng kan rinthu phuah khawm vel vek a ni. Lehkhabu kan neih har avangin unau tam tak kan inhloh zo ta niin a lang. Chuvangin vawiina Mizote hian he hnam hi a lo ngeh a, a lo zahawm deuh deuh theih nan zirna leh thu leh hla lamah hmasawn deuh deuh tum kan tum a, lehkhabu chhuah lamah ṭan kan lak a ṭul. Lehkhabu neih loh avangin hnam tam tak an lo boral tawh a, hnam ṭhenkhat humhalh ngaiin an awm mek. Lehkhabu ṭha neih tam loh avangin hnam tam takin an aia hnam lian zawkte chimral an tuar mek bawk. Mizo hnam hian kawng dik zawha hnam nghet ni tur chuan lehkhabu ṭha tam tak a mamawh a. Mizo Kristiante hmasawn zel nan lehkhabu hi a pawimawh a ni,” a ti.
Lalchhanhima chuan, “He lehkhabu hian Mizote lenna khawvel hmun hrang hrang a hrut kimin, a fang zau hle. A bik takin Malaysia Mizoten hun chep tak karah theihtawp chhuaha lungrual taka kan buatsaih a nihna leh Malaysia Mizote chanchin kimchang leh thlalak dah khawmna a nihna hian he lehkhabu hi a ti-hlu zual a, ‘ṭhial rei zawh poh leh a thlum zual ting mai’ tih angin, he lehkhabu hi chhiar ngun poh leh a ṭhatzia a lang thar zel a, khua a rei poh leh a hlu thar zel dawn a ni. ‘Mizo khawvela ramluah nei kumkhua tawh tur lehkhabu rotling’ ti ila kan uar lutuk lo ang chu maw!” a ti a. Mizo Christian Fellowship President & MRO Co-Ordinator Pu Hualsailova’n lehkhabu hi Pathian hnenah hlanin a ṭawngṭai a, lehkhabu hi khawvel hmun hrang hranga Mizote lei theih turin tlangzarh a ni.
Malaysia Mizo Christian Fellowship buatsaih “Kan Lenna Vangkhua” hi phek 282-a chhah, lehkhabu mawi leh changkang tak a ni a, India, Myanmar, Malaysia leh USA-a Mizo ziakmi mi chhuanawm 22-te thuziak hlu dah khawmna a ni. Malaysia-ah kawpi 500, Yangon-ah kawpi 500 chhutchhuah a ni a. He lehkhabu hi Malaysia, India, Myanmar, Singapore, Australia, Denmark, Norway, New Zealand, USA leh hmun dangah te hralhchhuah a ni ang a, he lehkhabu aṭanga an hmuh sum-pai zawng zawng hi Missionary chawmna atana hman tur a ni. Tin, he lehkhabu hi hmun hrang hranga library pawimawhah present tur a ni bawk.
A Chhunga Thu Awmte
1. Malaysia Mizote leh Refugee
Hualsailova
2. Mizo Christian Fellowship, Malaysia
Rev. Lalsawichhunga
3. Mizo Christian Fellowship, Malaysia
B. Zarzoliana
4. Malaysia Mizote Culture & Sport
B. Vanlalvula
5. Malaysia Zofate Khawsak Dan
Biakenga
6. MCF Hnena Lehkhathawn
Rev. Lalṭhuamluaia
7. Thlamuang Takin Kal Ang Che
Vanneihtluanga
8. Malay Ṭawng, Mizo Ṭawng Kara
Kan Hman Tel Ve Deuhte
Lalchhanhima
9. Zo Thlangtlak Nun
Thingler Sava
10. Thihna Nung
Chawngthangvunga
11. Zofate Lenna
Lalhuapzauva
12. Lenna Tlang Dang Mahse
Samuel Lalrozama Hmar
13. Lenna Vangkhua Mawi Nan
Lalṭhuamliana
14. Kristian Nun Dan Ṭha Lungphum
Gospel Hrilvelthanga
15. Hmeichhiate Tihchakna
Dr. R.L.Hnuni
16. Zoram Riangte Hian Hawl Zau Zel Se
Dr. Laltluangliana Khiangte
17. Identity
Dr. Lalrinawmi Ralte
18. Pi Pute Nun
C.Lalnunchanga
19. Kan Hliam A Dam Lo
Darrokima
20. Culture & Religion
Eden Thara
21. Remna Duhtute
Dr. R.L.Thanmawia
22. Baipui
VL Awia
23. Chhermei I Chhi Ang U
Ṭhuamtea Khawlhring
Kan Lenna Vangkhua (Lehkhabu) Chah Theihna leh A Mante
USA (US$15)
Australia (A$15)
New Zealand (NZ$15)
Denmark (US$15)
Norway (US$15)
Singapore (Sing$15)
Myanmar (A man zat la chiang lo)
Mizoram (A man zat la chiang lo)
Malaysia (RM20)
Date | 07/09/2011 |
By | Mapuia Hnamte |
Subject | A ropui thin e. |
Chiar ava chakawm tawh ve awm..................
—————
Date | 01/09/2011 |
By | Muanpuia, Kawnpui. Dist - Kolasib |
Subject | Kan Lenna Vangkhua |
Ka rilru khawih em em thin leh ka ngaihdan thlak thleng daihtu chu Mizoram pawna Mizo te dinhmun leh awm dan hi a ni thin a; Thianpa Chhanhima hian min tipiangthar tawh a. He lehkhabu hian chiang taka min hrilh ka ring tlat a; ka nghakhlel tawh nasa a ni.