KALAY UNIVERSITY MANGTHA MAI LE...

Tahan luahlum tur niawm takte paw'n " Hei aia hma kan sawn theih deuh dan tur kawng a awm mial lo maw aw" tiin ram pawn lamah tlanchhuah zai kan rel a ni ve ta der mai a! Kan ram lama ka hun hman ve tak te kha ka Class-room atang hian ka dawnkir changin, ka mawl leh nih ang ang ka lo zirchhuahna Kalay University-a len laini te kha a lo lang chhuak leh thin. Ni 30 May 2009 - 1 June 2009 - 10th Kuala Lumpur Coy Company Camp-ah kan zirlaite enkawl ni pahfawmin kan principle nen kan han tel ve a.Hmun hrang hrang atanga lo kalkhawm Kristian Zirlaite nen tuipui kama kan inbual tumin, 3rd year English ka zirlaia ka lo tuipui em em Poetry - " The Tide Rises , The Tide Falls" tih kha ka rilruah lo lutin, min rawn tel ta ringawt mai le!Tui-fawnin tui-kam chu a rawn vua a, a kir leh ta thin a, mahse tuipui ral rama chhingkhual chang kei ve hi chuan kir zai reng ka la rel ve thie si lo a nih hi maw...Nimin ral ta ang chauha ka hriat , a numbera han chhuta ni tam lo liam ta Kalay University hraichawi ka nih lai kha ngaiin ka au vang vang a,ka lunglen thu han hrilh tur Mizo tawng hria tumah an awm si lo.Vanglai hun chelh din reng theihna hmun nia an sawi Shangrila (The Lost Horrizon) te kha awm tak tak se tiin ka ngaihtuah nasa thin.Mahse , hun hi mitkhap khat lek pawh kan timuang khawtlai zo si lo...A hun a lo thlen chuan hreh tak chunga in mangtha mai loh zawng tih theih dang reng kan nei lo a nih hi!!!

Chung Pathian remruatnain tuisik ata mihringa dinin ka awm a.Chun leh zua,pianpui unau lungduhten mi ang sa ang ka nih ve theih nan,tiin zirna Skulah min kaitir tang tang a.Ka tlin vang leh thiam bik vang ni hauh lovin,an sawi Zawlkin Thiam - Thang - Run (Kalay University)ah ka lawi lut ve thei a nih kha! Kalay University hi a zauin a ropui em emna sawi tur awm lo mah se, a mawna leh lung a tihlen nasat zia erawh thua han sawi thiam mai a har a,sawi lova han ngawihpui reng la cu uihawm a ni bawk si.Lung tileng tur renga Khuanu'n a duh ang thala a lo duan a nihna bak sawi tur hriat a har a ni ber e.Chhak thlang chhim hmara hualtu tlang te,thal romei paw chiai mai te,lengkir te,tlang panga motor kawng var vo mai te, a hungchhunga thingkung buk tak tak, hawina lam apiang mai hlim nuam tak maia chamdiai mai te,Skul building hlui tawh tak tate...a... keia hmuh ve phak tawkah chuan ka lunglena tur chu a khat vek a ni ber mai.Chutiang taka lung min lentu,hmun hrang hrang atanga mi chi hrang hrang kal khawmten nuam ti taka thiam-thai kan zirna run nuam chu ka chhuahsan a tul ta tlat si a.Hriat thiam harsa ka ti tak meuh a,kala kham loh tehlul nen...

Khua a tlai ta a.Nu-in a fapa chhuat laia hlim taka a inkhualtelem lai chu,mut a hun tawh tiin pindan lamah a kai a.A fapa chuan a la kham lovin mut a la duh lo hle a nih tih hriat tak maiin,a inkhualtelemna bungrua chu ui em emin a thlir vauh vauh a.A nu chuan naktukah a aia tha zawk inkhualtelemna bungrua leisak tiamin, a fapa chu pindanah a kai lut dawr dawr ta.A la peih lo chung chu a mittir ta...

"As a found mother,when the day is o'er

Leads by the hand her little child to bed

Half willing,half reluctant to be led

An leave his broken playthings on the floor

Still gazing at them through the open door

Not wholly reassured and comforted

By promises of others in their stead

Which , though more splendid,may not please him more"

Hringfate pawh hi hun hian kan inpeih leh pieh loh te,rualduhte nena hlim taka hun hman dial dial kan kham leh kham lohte dawn chang lo lekin, hun hian a hun a thlen chuan tuantulna hmunah te,famkhuaahte min lawi luihtir thin a.Hlim taka len rih duh teh mah ila,a hun a thlen chuan tih thieh reng kan nei mawlh si lo...

"So nature deals with us,and takes away

Our plaything one by one,an by the hand

Leads us to rest so gently,that we go

Scare knowing if we wish to go or stay

Being too full sleep to understand

How far the unknown transcends the what we know"

Nitin maia thalai sang chuang zet kal khawm thin kan ni tih takah kan Skul boruak chu a zalen halh thin a nih kha mawle.Han en mai pawha mi hausa fanu/fapa tih hriat em em mai te,a then thingtlang atanga nei leh nei lova lo kal te,hnam hrang hrang;mize inang lo leh dinhmun inchen lo tak takte kan ni nuk bawk a,kan mak thin hlawm ngawt asin.Thenkhat motor/bike nen an nih laiin, thenkhat nitin bus uai thleng zak thin te,a then saikal(cycle) ngata kal thinte kan ni hlawm.Kan inthuam dan leh inchei dan lah a inang lo nasa hlawm khawp - thenkhat kum zabi 9-na hun laia la cheng niawm tak, thing lutuka inthuam an awm laiin, thenkhat erawh a tullai thei ang berin an incheiin an inthuam thng.Engtik lai pawha lukhum khum tlat tawk lah bo lo.Thenkhat thawveng em em an awm laiin,a then erawh an buai vut vut reng bawk.

A...sawisen rual a ni lo.Chu'ngho karah chuan kei,neih lama chhuan tur nei ve miah lo hi ka tel ve a.Tu khaw hriat lohvin ka nuam tih tawk ka hmuin,ka phur ve em em thin kha a ni a.Mahse,tunah chuan chu hmun chu thlahlel tak chungin ka then ta a nih hi!Hla siamtuin , "Tuipui luangin phairuang a hnawl...kan nun dan kawng zetin rengah khua rei an chang zo ta" a tih angin, hunin min hnawl a,hmanah chuan Kalay University-ah ka hlim thin teh asin,tia lunglen thu sawi chauh hi ka chan tawk a ni ta der mai a nih hi maw...

MSF (Mizo Student Fellowship - Universities of Kalay) boruak mawlh kha!Nuam ka ti thin teh a nia...Committee Meeting leh thil tihho nikhua reng reng hian kan hoh ang angin kan puithu hlawm riau a.Ka mawl ang angin ka urhsun ve thin teh mai a nia!Kan innel tlangin kan inpawh tlang a,kan hlim hle.Mite mit hmuhah cuan fapa/fanu awm tha duh lo ang taka lang thinte hlei hlei khan an nun chhungrila Tlawmngaihna nun duhawm an rawn pho chhuak a.A ropuiin an theihna an hlanna zawng zawng kha a hlu teh e.MSF thil tihna engkimah tel ve thei rih lo mah ila, ka theih ang tawk ka hlan ve thin a,ka phur ve thin hle.Mahse, chu pawh cu ka tan chuan a tawp hmak dawn ta der mai.A hun a thleng ta.Kha'ng huna ka thawhpuite leh hah-thi-kula kan thawhhona zawng zawngte kha ka thinlungah hian rial angin a dai mai mai tawh lo ang a,ngaiin ka la au ruai ruai zel dawn a ni.Thianpa Krossenga kut ninhleiin dawhkana tho(fly) tla lai,hlim em em maia a infiam lai chu a hmet hlum ta ringawt a.Chu tho chuan hlim tak maia infiam te,han zuana han thlawh velte nuam a la ti hle tih reng ka thianpa kut chuan a ngaihtuah lo.Chutiang chiah chuan hun hian ka chungah a ti ve ta a nih hi.

Theih nise University zirlai niha Kalay University ngata kal leh turin ka thiehna zawng zawng;ka thien tur leh neih tur zawng zawngte dahkham hial ka inhuam a,Kalay University-a kan nun dan leh khawsak vel dan zawng zawngte kha he khawvel kawlkil khawimaw lai atang hian hmuh leh theihna hmun awm ta ang ni se, chu hmun thleng tur chuan ka damchhung zawngin tan ka la ang a, ka thawk tur.Kei teh tak hian ngaiin ui hle mai ila,Kalay University chu min ngai lo ang maiin a awm ngaiin a awm reng si...Hnahhlui chu hnahtharin a rawn thlak ang a,thangtharte Kalay University-ah khan nuam ti takin an rawn kal ve ang a.Chutih hunah cuan hlim taka kan len ve lai te kha tuman an rawn hre ve tawh awm si lo.Aw...kan hun-tawng theuh te hi inang lo mah se,mahni tawkin mahni hlim lai ni te theuh kan la ngai thin zel dawn zawnga lo nih hi...Kalay University-a lenlai nite khan ka hriatrengna a luah kumkhua tawh dawn a nih hi!!! Kalay University Mangtha Mai Le...