Ka Pi leh Ka Pu

- V.L.Awia

Ka pi kha a nulat laiin khaw khat nula hmeltha hleitliang leh chhuanvawr,khawtlang mawitu a ni a. Ama ka ka dawn mai mah nise, ka ringhlel phal lo, ka pi a ni tlat a. A tuiburzuk a al ber a, a vaihlo zial tuizia lah an hrilhfak.Khawtlang tana theihtawp a chhuah thinzia leh thenawmte tan a hnawksak lohzia.....enga pawh chu nise, ka pi rilrua a ber a hauh duhna hian mi hneh fo thin.

Thingtlang tlangval tlawmngai, khua leh tui thlamuantu a nihzia ka puin min hrilh thin. Ka haihawt tehlul nen, khang thu kha chu ka theihnghilh thei lo. Sipaia a tan laiin a huaisen fal bik a, hotute'n an duhsakzia te sawiin a vanglaia a sulhhnute khan a nun rilah thu a sawi reng niin ka hria a. Lubawkin pension mah sela, ka ngainep chuang hauh lo.

Khawlvel eng hmuin kei ,an tu hian boruak rimchhia ka rawn hip ve a. Ka pi ro ka khawm vena tura mawi ka sakhmel hian vitamin a tlachham ngawih ngawih a. Vui tum teh mah ila ka lungawi lohna thlenna tur ka hre hlei lova. Darthlalang siam chhuaktu kha la dam ngat se, ka chhuahchhal duh ngei ang. Thian thaten," I hmel hi a hreawm em? "," A thip viau lo maw? "," A rit em? " tih vel mai maia min bawl chang hian nui liam ve mai thin mah ila, lung a awi mawlh lo.

Khawtlang tan ka tangkai nepzia ka hmuhin ka pu Thlarau zahawm ka ti thin. Thenawmte nen Debate nikhua a lo thlenin ka pi khan a zaidamna thlem tal min rawlruk ta lo kha pawi ka ti tawp thei lo. Mi dang aia thaa inngaihna, mahni thu tha bera ngaih burna rilru chapo tak hi ka pi nunah chuan hmuh tur a awi si lova.

Zirna run ka bel a, a ber nih tumna nei hauh lovin kum ka tluan a. Hnatlang a awmin zawmthaw hmahruai ka ni pek a. Ka pu kha la dam nise a tu ata min ban a duh rum rum ta ve ang. Tlawmngaih loh hahdamzia hre chiangtu ka ni miau alawm. Ka'n che ve hleka thiante thawk mawh deuh ka hmu thei lova. Tawngkama ka phut kher loh pawhin ka mit laipui mu a sur zung zung thin. Ka puin tlawmngaihna a tih chamchi kha thul mawngah ka khung hmuar mai dawn a nih hi. Evan tawngkam takin," Ka hul " a ni ber e.

Ka thawh fuh tuk rilru fimin mi bual tum chuan ka pi leh ka pu chunga malsawmna duhawm tak an nun timawia tizahawmtu, mite tana lungawina thlen thin thilte ka'n tlachham bik ta em em hi chu thaw a chham thelh thin. Pawl 4 pawh fail pha lo mahse, an nun rila thatna intuh nghetzia thlirin an duhawm a, an zahawm hliah hliah a ni.

Zuk leh hmuama fihlim lo nafam chu Thlarau ration chhimin Camp-ah riah luh a tul fo va.T um 5 ka kal chinah chuan tawngtai-khawl-ah min hai lut ve a. Upa-te ka hmu thing a, Pastor-te ka hmu ro va, ka chan ang chang ve lote chu sual bula la chiang lo hialah ka puh duh ta mai a, heng hi Camp-ah kan zir lova. A Thu Thianghlimin min zirtir bawk hek lo. " Mahni aia mi dangte thaa ruat " tih a lo ni zawk awm a.

Khawvel finna kawnga ka hnufual loh nan min hringtuten thenawm sum pukin School tha tha min zuanpui a, Chung lam nen inzawmna tha ka neih nan Home Crusade min buatsaihsak a.

Ka pi kha tap chhakah vawk chaw vilin, la kai chungin a inzir chhuak a. Ka pu pawh kha Zawlbuk bak zina dang a nei lo.

Zirna sang zawk, tunlai zawk, changkang zawk inti si hian kan nun inthlauhzia chu ril tak a ni. Nun tha, nun ngil, nun mawi tlachham reng reng hian Ka Pi leh Ka Pu nun kha thlahlelin ka ngai ngawih ngawih thin.