INTHLANNA-AH FOREIGNER TEL LO TURIN FIMKHUR TUL

VANGLAINI : Election Directorate hotute chuan, electoral roll-a ram dang mi (foreigner) an chuan loh nan fimkhur a tul thu leh, Assistant Electoral Registration Officer (AERO) leh Booth Level Officer (BLO) ten mawhphurhna sang tak an neih thu an sawi.

Election Directorate hotute chuan, AERO leh BLO an pawimawh hle tih an sawi a, "Anni hi khua/veng chhunga hearing neihnaa awm an ni a, dik taka an tih chuan foreigner electoral roll-a thunna chance a vâng," an ti. Foreigner-te electoral roll-a an awm theihna chhan lian ber nia an hriat chu - political party-te an nih thu leh, hearing-a tel ve V/C leh YMA-te pawhin khauh taka hma an lak a tul thu Vanglaini an hrilh.

Foreigner zingah affidavit nei awm thin thu an sawi rualin, pawm ngawt chi a nih loh thu Election hotute chuan an sawi a, "Fiahna awlsam tak chu anmahni emaw, an nu leh pate emaw kum 18 pêl tawh an nih a, awm thar tur an nih chuan pawm chi a ni lo," an ti a; hmun dangah awm tawh anga an insawi pawhin, electoral roll-ah en mil thin nise tha an tih thu an sawi bawk.

Electoral Roll-a foreigner chuang an awm pawhin paih leh theih an nih thu Election hotute chuan an sawi a, "Foreigner-te hming chuangte'n paih an duhna chhan ziakin an thehlut thei a, chu chu ngaihtuah that leh theih a ni," an ti. VC, YMA leh political party-te pawhin electoral roll-a foreigner chuang paih duh an neih chuan, an member electoral roll-a foreigner chuanna part-a awm hmingin complaint an thehlut thei a ni.

Zawhna chhangin Election hotute chuan, "Electoral Roll Summary Revision neih mekah foreigner thun an nih loh nan dan hman thar a awm chuang lo," an ti a. Electoral roll-a foreigner an chuan loh nan dan awmsa dik taka kenkawh a tâwk thu te, foreigner tamna hmunah chuan Commission-in tihdan tur bik a ruahmansa dan a awm vek thute leh, electoral roll-a a chuang tur dik takte chauh an chuan theih nana Election Commission of India thurawn angin, party tinin Booth Level Agent neih chu Mizoramah an la tlin loh thu an sawi bawk.