Inneih hmaa SEX hmang 43.27% an awm : Survey ---- Sex Video 500 velah Mizo ngei nia hriat 50 !

THE ZOZAM TIMES : Synod Social Front-a Coordinator ni mek Dr. Robert S.Halliday chuan SSF-in nupui pasal neih hmaa sex hman chungchang survey an neihah mi singthum chuang zawhna an zawh atangin nupui pasal neih hmaa mipat hmeichhiatna hmang tawh 13,501 (43.37%) an awm tih a sawi.

SSF Coordinator hian Mamit-a neih zawh tak KTP General Conference-ah ‘Thalaite Leh Tunlai Khawvel : Media & Sex’ tih sawiin, hursualna leh mipat hmeichhiatna hman chungchanga survey an neihah hian mi 31,202 hnenah, ‘Nupui pasal neih hmain sex i hmang tawh em?’ tih an zawt a. He zawhna chhangtu mi 13,501 (43.27%) te chuan inneih hma in sex an hmang tih an pha lo a, mi 16,500 (52.88%) te chuan an hmang lo tih sawiin, mi 1201 (3.85%) chuan he zawhna hi an chhang lo.

SSF hian mi 31202 hnenah vek hian nupui pasal neih hmaa sex hman pawi an tih leh tih loh an zawt bawk a. Mi 27,281 (87.43%) chuan pawi an tih thuin an chhang a, mi 3,080 (9.87%) chuan pawi an tih loh thu-a chhangin, midang 841 te chuan he zawhna hi an chhang lo a ni, a ti.

Tunlaia Mizo sex video hluar viau anga sawi chung-changah, sex video 500 vel awmin an hria a, heng zingah hian Mizo ni ngeia an hriat chu 50 bawr vel chauh an nih thu a sawi bawk.

KTP khawmpui report-a tarlan, nupui pasal inneih danin ngaihven a hlawh hle a, kum kalta chhunga KTP member nupui pasal nei 4,606 zingah zingah za zela 38.5 (1,775) te Biak In hawnga an inneih laiin, Biak In hawnga innei let aia tlem hret, za zela 61.5 chu hmun danga innei an ni thung. Biak In hawnga innei awm tamna bialte chu Electric Veng, Chawnpui leh Sialsuk bial te an ni a. Biak Ina innei awm lohna bial 11 awmin, hmundanga innei awm lohna (Buarpui, Cherhlun, Kohima leh Vathuampui) Bial 4 a awm thung. Hmundang aia Biak Ina innei tam zawkna Bial 35 a awm bawk.