India leh Myanmar Aiawhten Champhai-ah Meeting An Nei

Nimin zing dar 9:30 khan Champhai DC Conference Hall-ah Border Liaison Officers (BLO) meeting vawi khatna neih a ni a, he meeting ah hian India aiawhin Union Home Ministry a mi pawimawh te leh Myanmar a Chin State hotute an tel a ni.

He meeting hi ram pahnihte venhimna lama thawhhona tha zawk neih theihna tura hmalak tlan dan tura in rawn khawmna a ni. India sorkar palai hruaitu Pu S. Singh, Joint Secretary, (NE) Ministry of Home Affairs chuan BLO  neih anih chhan leh a tum te sawifiahin ram pahnih te tha taka thawkho tura hmalak chu an duh ber leh a tum ber a nih thu a sawi a, Myanmar palai hotu Pu U. Nay Aung pawhin thuhma sawiin an ni chu State pakhat aiawh mai an ni a, tun tum inbiakna a thutlukna an siam te chu hotu lian zawkte hnena a thlen tur thu leh a hlawhtlin ngei theihna tura lo bawhzui ngei a tum thu a sawi bawk a ni.

He meeting ah hian Chin State thuneitute leh Champhai District thuneitute awlsam taka an inbiakpawh zung zung theihna turin inbiakpawhna changkang CDMA hman nise an ti a, CDMA hmang hian Champhai atang pawhin Myanmar ram pumpui awlsam takin a biak theih a ni tih he meeting ah hian finfiah nghal a ni a, hei hi Chin State Police hotu leh Champhai District SP te hnenah a number an inpe tawn nghal a ni. Ramri hrula India leh Myanmar hel ho chet thin dan pawh sawichhuah a ni a, Myanmar ram chhung Chikha Sipai Post Commander in Manipur hel PLA te ramri hrula patrolling tura a hrilh chu an ngaimawh thu te, Hel pawl dangin mipui ti ralti zawnga chhiah an khawn dan te, Zokhawthar leh Champhai kaltlanga ralthuam leh ruihhlo hmanga sumdawng hovin India ran an rawn luh thin dan te, hei hian India rama hel pawl hrang hrang hnen a thlen thin thu te sawilan a ni a,  hemi chu ngchang ah pawh hian thawhhona tha tak nena tih tawp dan tur zawn ho nise an ti bawk a ni. Ram pahnih aiawhte hian Inteligence tih chakna tur te, Dan lova thiltih hrang hrang doletna tur te, thuruk inhlanchhawnna tur atana rawtna an neih hrang hrang te sawihovin Champhai DC leh Falam DC te chu mawhphurtu atan an ruat a, Falam SP leh Champhai SP, Zokhawthar OC leh Rih OC te chuan a tul dan a zirin lo bawhzui se an ti a. Inbiakpawhna lamah harsatna a awm lohna turin Myanmar sipai leh Police aiawhte chuan Champhai ah tawng zir se an ti a, tuna inbiakpawhna atan chuan Mizo tawng hman ni rih phawt se an ti bawk.

BLO meeting neih leh hun atan nakum 2011 April chawlhkar hmasa ber an ruat a, Myanmar ram chhungah he meeting hi neih nise an ti.

Meeting neih zawh hnu hian India sorkar-in Myanmar sorkar hnenah thilpek hlanna hun hman zui nghal a ni a, Myanmar sorkar hnena an thil hlante hi Bolero LX four wheel pakhat, Super Splendor Bike pathum, Diesel Generator (6 KVA) pakhat, Computer set 3 leh wireless set 6 an ni a, a vai hian cheng Nuai 20 vel man a ni.

He meeting-a India palaite chu Ministry of Home Affairs atangin Joint Secretary 3, Pu S. Singh, Pu R.R. Jha leh Pu Manoj Yadav te, Mizoram Home Secretary Pu Lalmalsawma, Director, Ministry of Home Affairs, Pu H.N. Mishra, Yangoon-a India palai Pi S. Rangnanathan, U/S Ministry of External Affairs Pi Anju Ranjan, Addl. DIG (Assam Rifles) Col. Pramod Roy bakah Mizoram atangin Champhai DC Pu Vijay Kumar Bhidhuri, SP Pu C. Lalthanmawia, DC (Excise) Pu Lalhmunsanga leh official dangte an ni a, Myanmar palai te hi Pu U. Nay Wing. Commander, Chin State, Lt. Col. Kyuaw Win Thein, Director of Police, Chin State Pu U. Khin, Win. DC, Falam, Maj. U. Tint Lwin, SP Falam Pu U. Janburboss, Head of Immigration Deptt., Pu U. Yo Son Khine, Gen. Adm. Officer, Pu Tun Aung Anti Narcotic Deptt., Pu U. Mg Mg Than, Custom Deptt. te bakah local representative Capt. Aung Aung leh Sgt. Htay Hytay te an ni.

Thulakna: DIPR