HPC(D) kan be thei reng : Hawla

16/04/2010 08:44

Chief min ister Lal Thanhawla chuan Hmar Peoples Convention (Democratic) te nen inremna nei turin sorkar chuan HPC(D) te a be thei reng tih a sawi.

HPC(D) te nena inremna neih a nih theihna tura kawng dap tur hian Sinlung Hills Development Council Area-a VC Coordination Committee hruaitute chuan vawiin khan chief minister Lal Thanhawla hi a office-ah an hmu a. Chief minister chuan HPC(D) te chu sorkarin a biak theih reng thu leh, sorkar lam erawh chu inbiakna rawt hmasatu-a tan a tum lem loh thu a sawi, thudawnna chuan a ti.

SHDC huam chhunga Village Council Coordination Committee hian nimin piah khan Tuikhuahthlang-ah meeting neiin, chief minister Lal Than-hawla kaihhruai sorkar chu mipuite harsatna hriatthiampuia, rammu mek HPC’D’ te nen inremna kawng dapa be ngei tura ngen nise tih resolution an lo siam tawh bawk.

SHDC VC Coordination Committee chuan kum 1966-a Mizoram buai atangin SHDC huam chhung mipuiten buaina chi hrang hrang an tawk reng tih an sawi a. HPC’D’ leh sorkarin inremna an neih theih nan hian sorkar hmalakna leh a tul ang zela mipuite harsatna sukiang tura hmalak an inpeih reng a ni, an ti.

Thulakna: The Zozam Times

Back