Hnam Tlem Zawkte Harsatna Sutkiansak Tura Minority Commission Hi Ding A Ni - HT Sangliana

Pu H.T.Sangliana chuan Vice Chairman a nihna National Commission for Minorities hna leh a dinchhan chu India rama hnam leh sakhaw te leh tlem zawkten an tlem zawk avanga harsatna an tawhte sutkiansak a ni a ti.

Nimin khan PIB Media Centre-ah chanchinbumite kawmin Bangalore North atanga Lok Sabha Member (MP) hlui chuan National Minority Commission Vice Chairman a nih angin Sikkim tel lovin India hmar chhak pum, Orissa, Jharkhand leh Chhattisgarh te a bial tih a sawi a. Mizoram a tlawh chungchang sawiin Bru leh Chakma hruaitute a kawm a, anniho hi Mizo nihnaah an chian phawt chuan an tan Mizoramah harsatna a awm loh tur thu a sawipui tih a sawi a, Bru leh Chakma hruaitute pawhin tha an ti hle niin a sawi.

Pu Sangliana chuan chi leh chi, hnam leh hnam inkara harsatna a thlen hian ramin hma a sawn thei lo a. Hetiang thil a lo thlen hian Commission chuan nu leh pa chan changin harsatnate chingfel turin hna a thawk thin a ni a ti. Hnam tenau leh tlem zawkte chimrala an awm loh nan te, an tana harsatna awm thei turte thlirlawkin a chinfel dan a dap thin a ni a ti.

Pu Sangliana chuan Bung thuam khaw daia nikum November thlaa thil thleng avanga in hal chhan hre tura Mizoram chu tlawh a nih thu a sawi bawk a. Mizote chu Mizoramah hnam tlem zawkte laka nu leh pa chan chang turin a ti. Manipur-ah Kristian thah leh in halsak thil thleng avangin a tlawh bawk tih a sawi. Thla tharah Tripura tlawhin Bru-ho chinchang a zirchiang dawn tih a sawi bawk.