HNAM LUNGPHUM

- Rokunga

A hmasa berin he hmuna thu sawina hun remchang ka neih avangin Station Director hnenah leh mi ngaithlatu zawng zawngte hnenah lawm thu ka sawi e.

Zanina ka thu han sawi tur hi HNAM LUNGPHUM tih a ni a.Chu chu Mizo ram chauh ni lovin India leh khawvel pum tan pawh a ni bawk e.

Awle, Hnam lungphum atan chuan eng nge tha be rang a, tlo ber ang le? A chhanna chu RINAWMNA tih hi a ni. He thu pawimawh tak sawi nan hian minit ruk chauh chu a rei lo hle a, mahse theih ang angin han bei hram hram ila.

Kan ram ropuina ber TLAWMNGAIHNA timawi famkimtu chu RINAWMNA hi a ni a.He rinawmna hi kan mi hmasa Vanapa te, tlangval zahawm Taitesena te leh kan pasaltha dang tam takte khan an vawn ngheh em em avangin a ni, kan ram hian mawina lallukhum a lo khum tawh a ni.

Kan ram ropuinate zawng zawng zinga chhuanawm ber pakhat chu “Thingfak a kawngkalh” kha a ni.Khatih lai Mizo ram cu “Khawvel Pialral a ni” tih mai loh chu hming dang han vuah tur chin lem pawh ka hre love. Kan vela mite rukruk leh inrawk ching reng renga an hmanhlel laiin, keini ram te tak te hi ti mai ila, Pialral ni zungin a rawn kap eng a, kan vela miten tala lian pui pui hmang chung pawha zana muhil tha ngam lova an awm laiin, kan ram hi chuan kawngkhara thingfak a intun chuan a him zawkin a muanawm zawk em em a ni.

Aw Zo ram nuam i hming a mawi mang e,

Kan pi kan pu mi thate lo pianna;

I tlang thingzar, thlifim, i zotui thiang reng hian,

Rilru sang tak leh nun mawi tak min pe.

Tichuan kan ram chu RINAWMNA BANG  a nghet taka hung tlat a nih avangin a him hle thin a lo  ni.

Awle, kan ram nuam leh duhawm tak chu tun hma kum 25 vel kha lo thlir leh ta ila. Khatih lai khan mi tam ber chu Kristian kan ni tawh a, kan lungrualin kan in kawmngeih a, chhungkhat lianpui ang maiin kan inhmangaih dial dial thin a nih kha.Tin, kan hla phuah thiam Pu Pate ate, Pu Kamlala te, Pu Siamliana te leh hla phuah thiam dangte ho chuan kan ram dung leh vangah hian kan ram boruak leh thing hnah te nena inchawih mawi tawk em emin hla thar mawi tak tak te min siamsak a, chung hla mawi tak tak hmang chuan kan ram naupang, nula tlangval, tarte thleng pawhin min lo awi tlei tawh a. A ni, khatih lai kha chuan tu dang mah kan ngaih bik ngai loh kha le. Tunah erawh chuan chung hun hlimawm tak takte chuan min lo her liansan zo ta.

Mizo ram hi hla mawi sakna, Lo ni se kan dil leh che,

A thlifim van tingtang ri, Ram tinah theh darh leh se;

tiin i zai leh ang u hmiang?

Awle, tun lai hunah hian eng nge kan lo nih tak le? Kan zinga mi fingvar deuh te chu milian mi lal an lo ni zo ta.Hnam dang lakah pawh min hliahkhuhin min ti thawveng tawh ang chu. Kan thaw a veng tak tak em le? Mi thenkhatte chu an thaw a veng hle a ni thei e, mipui erawh chu an thaw a veng ve kher lo ve. Mi thenkhat hausa leh lian tate nuam tawl leh duhawm luattukna avangin thenkhat zawng lungngaiin kan kun awm e. Ramhuai lal Belzibula chuan tangka sumin mi lian thenkhatte lung a ti awi a, thianah a siam a, sundawngte thenkhatte thinglunga hmangaihna leh thatna awm chhun chu tangka sumin a leisak a, thuneitu thenkhat rinawmna neih chhun chu tangka telin a deng chim ta! A va pawi em!!

Ka ropuina a chuai ta,

Bang nghet chu a chim ta,

A chhia cu kan sunin

Zo ram kan hrereng e.

Aw, kan naupan laia kan hmanlai rinawmnate kha khawiah nge an awm tak?

Kan panlai hunte leh kan vanglai nite kha,

Dawn kirin lunglen a zual em!

Thinlai kawl ang a hnim,

Ngai mah ila, au mah ila, mual an liam ta, kir an rel lo.

A ni, kan hmanlai rinawmnate khan lokir leh reng an rel ta si lo.

Awle, hunte chuan kan hmanlai rinawmnate chu liampui ta mah se, tuisik bawk hnu ruh leh theih loh ang em chuan kan ngai tur zawng a ni love.

Thangthar lehkha thiam leh zirlai duhtakte u, hnam lungphum tha ber chu RINAWMNA hi a ni, tih in zirlai buah te leh in lehkhabu chhiar reng rengah te pawh a tel ve lo’m ni? Thiamna leh hriatnate, hausakna leh ropuinate hi hlu hle tak mah se, Rinawmna tel lo chuan boralna mai a ni.

Chuvangin RINAWMNA hi hnam lungphum tha ber a ni a, hnam rinawmna chu mi mal theuhvah hian a innghat a.Chuvangin engkimah rinawma awm turin i nu ZORAMI chuan a ngiat che a, a tana i rinawmna lo par chhuak tur chu thal tui kang nghah takin a nghah che hi.

Thulakna: Mizo Nih Tinuamtu Rokunga