HM-in Pianga thih dan chhui chhuahtir tum

Home Minister R Lalzirliana chuan, "Lalpiangliana thihna chungchanga a mawhphurtu zawng chhuak ngei turin police hotu lúte pawh ka hrilh a, chutiang tur chuan hma pawh an lain ka hria," a ti.

Nimina Ist Batch Commando course training-te thlahna hun, PTC Lungverha a hmanpuinaah thu sawiin, Lalpiangliana thih dan chu chhuichhuah a harsat a rin loh thu Home Minister chuan a sawi a, "Sawisak vanga thi niin lang a, a thihna huang chhung a tâwi a, police kuta a awm lai nge, Central Jail-ah tih mai a ni. Hmun dang chhui vak chi pawh a ni lo a, chhui chhuak thei lo tur khawpa tha lo police Mizoramin a nei lo, an chhui chhuah ngei ka ring. Mawhphurtu hi zawn chhuah a nih loh chuan nakin zelah pawh hnam ang pawha thil mualphothlak a ni ang," a ti bawk.

Home Minister chuan, Lalpiangliana thih thu a hriatin a rilru a nat thu a sawi a, "Heti taka police an tan lai leh, record pawh tunhma zawng zawng aia an neih that laia hetiang thil a thleng kha ná ka ti; rilru a na duh khawp mai. Miin an thiltihte dan lo a ni tih hria a, an tualthah inchhir a, humhim theitu an pan a, hrem pawh phû tih inhriain nunna a chán hi a runthlak a ni," a ti.

R Lalzirliana chuan, "Lalpiangliana thih hnuah, New Vervekah police custody-ah inawkhlum an awm leh nghal nen, bike sut ngei ngei pawh mi thah a ni mai awm mange tih rilrupu an awm phah a ni. Engemaw thil dik lo a thlen hi chuan mualphona dang hian a zui duh khawp mai," a ti. Hetihrual hian Lalpiangliana thihna chungchanga mipuiin kawng zawh zawng leh eng emaw zawnga lungawi lohna an lantir lo chu mipuiin Mizoram sorkar an rin tawkzia tilangtu leh, tihtakzeta an chhui tih an pawm vang nia a ngaih thu a sawi.

Thulakna: Vanglaini