HLA THU LO PIAN DAN

17/04/2010 00:57

-R.L.Thanmawia

Thu hi hla a ni a, hla hi htu a ni, an lo tih thin hi a dik khawp mai.Thu leh hla thu te hi chhulkhat kual an nih avangin thil thuhmun ni chiah si lo,thil hrang hrang daih anga sawi hleih thieh bawk si loh an ni a.Chuvangin lhla hian ama tawng bik a nei reng em tih hi hmakhawsang ata inhnialna a ni fo tawh thin a.A lo intanna pawh literatr=ure-a sul lo sute , Greek-ho atangin a ni a.

Greek mifing Plato-an hla phuahtute nasa taka sawisela,chung lam Pathian (Muse) hnen atanga an dawn ang pawh ni lo va,thu puarpawlenga mite riltru dawivaihna ang dawn dawna hlate a chan tak avangin a vuak letna leh hla phuahtute chhan nan ama zirlai thin Greek philosopher ropui tak Aristotle-a chuan 335-332 BC inkar khan Poetics tih a ziak a, chu lehkhabu chu literary creticism tak tak intanna a ni ta a.Aristotle-a chuan Poetry ziarang leh kal hmangte sawiin , tawng tualleng leh hla thu danglam dan te a sawi thleng a,amahin thu hman zen zen lohte hmangin,inhmehbelna thu (metaphor) te leh hla tawngkauchheh mawi tak takte a hamgn nghal bawk a.Aristotle-a hnua Greek leh Roman critics zingah Cecero-a te,Demetrius-a te,Horacc-a te leh Quintilian-a te'n hla thu hman dan leh hla pianzia te thiam takin an rawn sawi leh a.Dante-a pawhin hla tawngkam chungchang a ngaihdan chu De Vugari Eloquentla-ah a rawn tarlang bawk a.

Renaissance hun hma lam zawng kha chuan hla thu atan hian Greek leh Latin tawnga hla thu awm sa kher kha hman tura ngaihna a lian hle a.Amaherawhchu Renaissance hun laia English hla phuahtute kha chuan hla phuahtute zalenna thu an rawn tlangaupui ta a.Anmahni tawng ngeiin hla thu an rawn chher chhuak a.Willian Shakespear-a phei chuan chhiar tham ngial hla thu a chher thar a.Amaherawhchu anni pawh hian hla thu atan chuan hriat tlanglawn vak loh khawrh khawm a,tawngkam un pui pui kher hman tura ngaihna lian tak an la nei a.

Elizabethan poet-ho ngaihdan chuan an hnua hla phuahtute,Metaphysical poet-ho tawn a hlawh hle a.Metaphusical poet-ho chuan Elizabethan poet-hote hla thu un pui pui leh sawi chhuah dan kawngkal bithliah thlip thlep chu a tul lohzia an rawn tlangau pui ve a.Heng rinna leh thlarau lam hla phuahtute hian tawngkam tluangtlam tak takin an hla thute an remkhawm a,English hla phuahtu John Donne-a chu he ngaihdan paw chhuaktu lar ber a ni.

Metaphysical poet-ho ngaihdan hi 18th century-a poet-ho zingah chuan a tlangtla leh ta chuang lo va.John Dryden-a leh Alexander Pope-a te phei chuan hla thu chu mi naran hriat thiam loh a ni tur a ni an ti hial a.Romantic Poet zinga hnarkaitu ber Willian Wordsworth-a chuan a ngai te bawkin metaphysical poet-ho ngaihdan chu a rawn chawk nung a.A lehkhabu, Preface to th Lyrical Ballads tihah chuan hla ziaranga a ngaihdan tarlangin hla thu chu a mawl thei ang bera hman a rawn sawi mawi leh a.Thu leh hla thu te hi an hrang lo va, a hrang a hraia awm a tul hek lo a ti hial a.

Amaherawchu a unaupa Coleridge-an a theory-te uluk taka a'n deksak vel chuan hla thute hi zawng kan inkawmna tawng tuallenga kan hman nen hi chuan a danglam ngei ngei a tul a ni a rawn tihsak ve leh a; chu chu an hnu lawka Victorian poet-ho rilrem zawng tak pawh a ni a.Mahse kum zabi 20-na a rawn her chhuah chuan American poet T.S.Eliot-a teho chuan hla thu bik a awm chuang lo.A tluangtlam thei ang bera phuah tur a ni an rawn ti thar ve leh ta a.Lal Solomona'n , "Thli chu chhin zawngin a tleh a,hmar hawiin a lo let leh a;a tleh vel a tleh vel a;a bial ngaiah akir leh thin a,"(Thuhriltu 1:6) a tih angin hla ziarang leh hla thu hman dan chungchangah hian hun hrang hranga mite ngaihdan a hrang a,an insawisel chhawk vel mai mai bawk a ni.

Mizote zingah pawh Vankhama'n hla thu un pui pui a hmante sawisel tawk an awm laiin tunlai hla ho hi hla pawh ani lo va,thu thluk nei mai a ni alawm ti an awm bawk a.Thomas Grey-a'n "A hun lai tawng tualleng hi hla thu a ni lo," a tih hi a dik khat viau mai.Hla thu leh hla tawng bik awm chuang lo ti sa teh mah ila a awm miau si a,hla thu hlangin hla a siam hleih thieh lawi bawk si lo va.Hla thu hi thu pangngai atangin lahrang dawn ila thu atang hla thu dangte an nih vek bakah,hla thua kan hman tan tak hi hun hmaa tawng tualleng te kha na ni a.

Hla thu hi thu-chingal a ni ber awm e.Tuisik pangngai kha chingalthlawrbura vut a kal tlang hnu chuan a al tawh a;tui chu la ni reng mahse tui kan ti tawh lo va,thlawr loh tui nen chuan a inang tei tawh hek lo.Chuvangin tawng tualleng ni thin kha thlawr a ih hnu chuan hla thu a chang thin,A hmangtuin a thiam phei chuan a hun laia tawng tualleng ngei pawh hla thu mawi takah a chang thei a ni.

Pu R.Lalrawna'n "Tawng hi nunna nei ni lo mah se a hmangtute hi mi nung kan nih avangin nung ve reng , engemaw kawng zawng zawng chuan danglam reng thin a ni"(Thu leh Hla Kutpui , 1987-a Seminar paper) a tih angin hla hi a nung a , thisen mur te te chu thi tawk awm thin mah se a tharin a thlak reng ang hian hla thute hi hman zui hlawh lo awm bawk thin mah se a piang thar zel a.Hla phuahtute an remhre zel a,thu pakhat mai pawh awmze hrang hrang neiin an hmang thiam a.Chuvangin hla ti-hlatu thute hi an che reng a,an thang reng a,mihring awm chhung chuan an pian hat belh zel dawn a ni.Mizote hla thu pawh hi hman zui hlawh lo va,zawi zawia vuiliam zel ni-a ngai pawl awm mahse , a la pung zel a, a pun belh zel bawkdawn a ni.Hetianga Mizote hla thu lo pian chhuah dante hi kawng hrang hrangin......