Heile Aizawl chu!

- T.Lalramzauva

Hei le Aizawl chu! Kawngpuia motor inhnawh mup mup karah ke-a kal mipui an zi nuai nuai a. Ke-a kalna tura siam tam zawk chu inpho hoin an luah tlat vangin ke-a kalte motor kawngpuiah a remchan dan ang anga in zeh hram hram a ngai a.

6th Pay chung changa Cabinet Sub-Committee  rawtna chuan sawi zui a hlawh, sorkar hnathawk zingah faktu leh seltu an inbuan tawk viauin a lang.  Kan ramah hian tun kum hnih khat chhunga khaw lum zualna chhan hi, misual pawikhawih chingten nasa taka ram an tih kan vang a ni. He ram kang hian khawlum a ti zual chauh ni lovin nungcha leh ramhmul tam tak a ti hlum a, kan ram rohlu te suat leh tih mangin an awm mek a ni. Nungcha leh thing leh mau te humhalh leh duat nachang hriat hi mi puitling nihna leh hnam fing zia a ni.

Aizawl hi City tih hming pu tlakin inrelbawlna leh inenkawlna a inher rem chho mek a. The Mizoram Municipalities Act, 2007 (As ammended in 2009) hmangin tun atanga reiloteah Municipal Council kan nei thei dawnin a lang ta. District dang khawpui te pawhin Municipal Board nei ve thei thuai turah ngai ila. Tuihawk luan dan te, bazar hmun te leh khawpui chhung inenkawlna hrang hrang atang te hian Municipal Council kan mamawhna chu a lang chiang khawp mai. Ruah bawhawk han sur hlek se la hmun thenkhatah kawngpui te tuihawk leh hnawlin a khat nghal a, mi kawng kal lai tuihawkin a lo la thul nen! Chawlhni thuamhnaw nen ‘confi’ tawka khawlai han len chhuah ve tuma driver polite lote’n  tuihawk min chil per chang leh, tute bathlar atang emaw a tui chhe paihin min buak ni phei chuan insum hman lova thinrim chiam mai pawh awl tak a ni.

Thawhtan atanga Zirtawp inkar chhung zawng chu kan kawngpui dung te hi sorkar motor, public service motor leh sumdawng bungruain a luah a. Inrinni leh Pathianni-ah chuan kawngpui thawl nuam deuha veivah te pawh a chakawm thin. Amaherawhchu Inrinni apiangin veng hrang hranga kawng lun lai leh kawngpui remchang deuh te chu bazar hmunpuiah a chang a. Vawk puah sa te kawngpuiah an let nget ngut a, thlai hring zawrh lai te pawh motor khu leh vaivutin an bawh chum chum a. Inti changkang taka motor tha tak tak nena bazarin chung chawhmeh leh sa te chu kan lei a. Hetianga kawngpui dunga bazar mai hi a hahdam a, a awlsam bawk. Mahse... kawngpui a ti chepin kawngpuia chetsualna a ti tam a. Chu mai ni lovin sa leh thlai zawrh lai te a thianghlim tawk lo a, a changkang lo hrim hrim bawk. Amaherawhchu, heng bazar hmuna inpho thin te hi mi harsa te te an ni a, an tih fuh loh tum chuan an chawibelh thin. Bazar a thu thin te leh a dawrtute tan tun aia tha, changkang leh hlawk zawk hian ruahmanna a siam theih ngei ang.

Aizawl khawpui chhungah kawngpui anin workshop chi hrang hrang Vehicle Workshop, Furniture Workshop, Iron & Steel Workshop leh a dangte kan nei thluah a. Heng workshop-a bungua leh anmahni dawrtute lirthei hian kawngpui a luah fo thin avangin kawng a chep phah thin a. Bungraw rit leh hriam tak tak te, oil leh thir chhe nawi te hian kawng an ti hmelhemin an ti tawp a, boruak bawlhhlawh leh ri bengchheng a siam nasa hle bawk. Heng workshop-te hi khawpui chhunga an awm vek na chhan bulpui chu a dawrtu mipuite hian a pan awlsam leh pan nuam apiang kan bawh vang leh sorkarin ruahmanna fel tak a neih loh vang a ni.

Khawpui lian, inrelbawlna fel tak awmnaah chuan chhun khaw en chhung hian kawngpuiah motor an tawlh chhuak dul dul a, zanah chuan  khawlai a reh duak a, kawng sira motor inhung hmuh tur pawh vâng tak a ni. Aizawlah chuan chhuna kawngpuia motor tlan zawng zawng kha zanah kawng sirah an ding leh ta vek emaw tih turin kawng dung tluanin an ding ngir leh khup thin. Hei hi Traffic lam thuneituten an ngaimawh a, thian fai turin hma an la tan ta a, a lawmawm hle.

Aizawl khawpui chhung leh a chhehvelah hian ramngaw hmuh tur a tlem ta hle mai. Mipui vantlang tan hmunawl  a vâng hle bawk. Mimal ramin a khat a, sum nei apiangin an ramah in sak khah vek an tum bawk si. Mihausa leh mi thil ti theiten ram zau tak tak cheibawl sen loh an nei.  Engati nge kan pi leh pute khan an tu leh fa te len khawthawnna tur hmun awl tlem tal min lo zuah sak loh le!

Tuihawk kawng bo te, chenna in leh kawtthler awmze awm lo a in pharh nuai te, khawpui chhunga workshop hrang hrang khu luai luai leh ri chuah chuah mai te, Inrinni bazar buai nuaih thin te, thingkung a tlem avanga khaw chhung ro vawng vawng leh sa huam huam te hian Municipal Council lo piang tur hi an buaina leh harsatna tawh mek atanga chhanchhuaktu tur a nih beiseiin nghakhlel takin an lo thlir a ni.
Khawi ramah pawh sorkar hmalakna hi mipui thlawpna leh tawiawmna nen a kal kawp loh chuan a hlawhtling ziktluak thei lo. Chuvangin kan veng, kan khua hmasawnna tura sorkarin ruahmanna a siam te hi mipui hian phur tak leh rinawm takin i tawiawm thin ang u. Sorkar hian thil engkim hi min thawh sak turah dah bik lo i la, kan phak tawkah mahni awmna veng theuh nuam taka siam turin tha thawh thar leh ila.  |hangthare hi chuan tuna kan dinhmun atang hian Aizawl hi  changkang leh mawi zawka chhuah turin ke i pen ang u. A kum tela khawlum zual zel ti reh tur leh sik leh sa mumal tak hnuaia boruak thianghlim hnianghnar tak kan neih theih nan mitinin tih theih kan nei.

(1) Thingphun a lo hun leh ta a, mimal ram leh vantlang ramah a tam thei ang ber thingphun ila, chung chu enkawl puitling ngei bawk ila. Tin, thing tualto te hi duat ila, kum nga chhung uluk taka kan enkawl chuan hmun nuam tak a lo ni mai ang.
(2) Veng thenkhatin an tih mek ang hian kan thlanmual hlui leh hman mek te hi Park nuam taka siam turin a remchang lai apiangah thing phun khat ila.
(3) Thingkung puitling tawh 7 (pasarih) hian mi pakhat mamawh tawk Oxygen pe chhuak thei anga ngaih a ni. Chhungtin te hian kan chhungkaw mamawh tawk pe chhuak thei tur  thingkung neih i tum theuh ang u.
Kan tu leh fa te hnenah leh a la hmu ngai lo hnenah “Hei le Aizawl chu!” tia chhuang taka kan sawi theih nan thalaiten hma i la ang u.

Thulakna: Vanglaini