Hei Ha!!! Hui Ha!!!

- Vantei Pa

Pa chhe kum tiam an sawi ang maiin nakkum chu tih hi Chorus-ah ka han nei phawt a, a lo thleng a, a ngai te bawk, a danglam chuang lo. Dang lamna awm chhun pawh mahni ni lovin eiin man chauh. Chuti a nih a hnu, awmawl leh ei tui a tih theih lova, awmawl chu tamna tih a lo ni zawk a. Hah tih kula thawkin eiin kan hmu tawk a. Chu lah chu a tui kan la ei pha lo zui. A tuite lah chu ka hian a hre khawp, en miah lo pawhin a byheart em em a, a tui hriatna lamah chuan distinction hmu thei kan ni tih chu hai rual a awm hlei nem. Kei chang ka nih ka ring phal lo phawt. Sa duh Kohhran din ta ila, member tur chu: Tunlai Kohhran siper dollar um avanga member zawng du du angin zawn a ngaih pawh ka ring hrep lo. Kan fate ngei pawh, “Chaw ei tawh rawh u,” tih rualin ‘sa nen ’ an lo ve hman pek a. Buhfai man tur pawha buai nak alaia an tawng theih tek tek atang ‘sa nen ’ an han ti nghal pang mai chu, pa ber hi ka in-withdraw teuh thei asin.

Kan tunlai hun teh hrep hi! Ei avanga thawh ni lovin thawh avanga ei an ti chamchi mai a. Thatchhe zawrkawi Samdala unaupa tan chuan mei alh en chu sawi loh thing neih loh phei chuan a alh en tur awm lovin a khu chauh kan la en lovang tih hi tunge sawi thei? Nimahsela, kan chheh vel hi thlir ila, hnathawk lova Sapa tal ve mai mai chaw ei hun chauha thlan tla, tlai lam dar 5 vel nghak a, tawm kual mai mai i hmu ve nual lo maw...nula puanthui dawra tawm nileng thak thei khawpa tuar chhel leh rikrum thil avanga pawimawh nei ni awm fahrana Bike-a chak tawka tlana mi dawra darkar khat vel zet tawm kual mai maite pawh hian chhuan khat takngial pawh an nghei bik chuang miah lo. Chung mite tih dan chu tehkhin han tum ve ila kan mualpho a chha chu a ni nghal bawk ang. Eng kan ti bik nge ni!!

Han puh ber tur awm hauh si lovin kan harsat ngaiin kan harsa tluk tluk mai a. Awl bik awm hauh lovin kan thawk char char hlawm a. Chuti chung chuan kan ei tawk a, thenkhatte chu keini aia an thawh chuang liam sawi tur awm hauh si lovin an indaih em em mai bawk a. Hriat ka la chak fo chu: Thawk vek lote ei theih dan hi a ni. A then chu kan mit hmuha an thawh vak awm pawh hmuh tur awm hauh si lovin kan eiin angin an eiin mai ni lovin a ei tui hlei hlei an la ni zui. Kan hmuha an thawh level chiahin han thawk ve ila, pumpuiah rulhut leh buh fang khat bak inum kual tur an awm hauh lovang tih chu sure loh paw’n ngei ngei a ni ringawt. Eng emaw chang phei chuan Joba ang maia Siamtu chunga tuan mai pawh awl tur tak a ni. Eng pawh nise, Hei Ha!! Hui Ha!! min tihtir fo thintu retheihna hi lei chu sawi loh duh an awm phawt chuan engtik lai pawhin a thlawnin ka pe phal tih hi!!

Heti em ema kan intodelh lohna chhan hi ka ngaihtuah chiang a, thil dang vang ni lovin ‘sum ’ kan ngah tawk loh vang ni berin ka hre ta. Sum neih loh chauh thu ba rawhah ‘sum ngainat hi sual tinreng bul a ni ’ han ti vel mah ila, kuta hum engmah a awm loh chuan a ro hian kan ro tlawk tlawk mai a ni a. Chhungkua pawh hi kan hlim tur ang tak takin kan hlim hlei thei der lo. Inphut a na duh teh mai a nia. Kuta sum hum a awm vak loh chuan nu ber Bazarin eng vak va lei suh! Pa ber hnathawk haw, chaw ei tura thutna han rem fel hi, tawngtai peih lova bar mai awl tak asin. Hetia kan ei chhiat vang nge ni, kan aia neite bakah natna hian min zuam bik riau lehnghal a. A khat tawk hian kan innat chhawk deuh reng mai a, pakhat a nat tawh hi chuan sum bawm a kaw hawk mai a, chawhmeh tha lei aiin damdawi kha fe fe kan lei nghek nghek mai a ni. Sum indeih loh zualpui laia han nat tak tak hi chuan Pa ber hi kan hawi tawi tut mai a, mite ngaihin rinawmna kan tlachham zo ta em ni aw! ka ti hman pek thin. A chhan chu, rulh tur kan neih loh an hlauh vang nge? Sum puk tur hi hnai vaite hnenah pawh a vang raih mai asin. Chu sum harsatna avang chuan kan natna tam tak pawh kan palzam fova, a tawpah tih tawk a awm an tih ang deuhin kan taksa vengtu sipaiten an do zawh loh meuh chuan khum beta mut tlawk tlawk kha kan tih theih tawk chu a ni leh mai.

Sum lamah tlachhe viau mah ila, hriatna lamah chuan ka tlachhe lutuk bik lo asin. Mi ningkhawng leh tih tur, tih awmte pawh kan hre ve tho. Tunlai khawvelah mi tinte mahni hna theuhah kan tul hlawm avangin chhiat ni that ni takngial pawh kan inlawm a ni ber tawh tih pawh hi ka hai bik hauh lo! Rem chan loh lai chuan, mitthi rala kal pawh hi awl lo tak asin. Tanpuina dawhtute hi mipui kal ngei ngeina tur ni bera an ngaihah dawhkan nena inchhawpin an lo thu khun mai a. Khata thlak tur remchang ve lo tan chuan mi sawichhiat pawh ngai lovin a rukin kan zak chem chem mai thin asin. Chu mai a ni hlei nem, an unau ral awm ngawih ngawiha kan hriat pawh hi ‘Beng tivar ngam lovin kan chhu chhet ’ lui tlat thin! Thenkhatte lah hian, ‘kut hum neih kher a ngai hlei nem, hmel lan theih chuan a tawk lutuk alawm ,’ an han ti chamchi a. Nimahsela, anmahni ngei pawh kut hum nei lo chuan an kal duh bik thak lo. Hei hi kan hri vei rapthlak tak chu a ni miau si a!!

Damlo kan pawh hi ka peih loh vang leh ka bengvar loh vanga kal lo thin ka ni hlei nem, sum a awm loh avangin bengvar ka chhuah ngam lo mai zawk a ni. Ka kal ve chhun pawh hian fimkhur a ngai teh asin. Mi pakhat kanna tur bak sum ka neih thin loh avangin ka kal pawhin khaw dang hawi maih lovin ka mi kan tur awmna lam ka pan ding ngar ngar thin.

He sum problem vang chauh ni lova ka la hei ha!! fona chu: Ram thenkhat ten an ram chhungah mihring an tam lutuk avangin Birth Control an uar a, chumi zul zuiin kein mi rethei hovin chawm zawh loh fa neih hlauvin pahnih thum ai bak kan nei ngam hlawm tawh lova, a nei nung zawkte lahin chawm hnen engang mah se, foreign style ngat la thin Zofate hian, kan hma lam hun tur thlir chuang lovin Birth Control kan lo uar ve bawk a. Zofate hi he khawvel map-ah chuan chhut han pawh kan tluk lo mai thei! Chutiang zat lekin khawvela mihring tamna ber China style ka la e lo tih ve rik ngawt chu a dik be rang em? Tlem nak alaia tun atanga Birth Control kan uar viau chuan tun hnu kum 50 velah chuan hnam dang hian min chim ral mai ang tih pawh hlauhawm tak a ni. Chu achhapah hnam dang mi pawm hreh lo nula tlangval kan la awm zauh zeuh bawk si a.

He foreign style an tih fo hi asin ka chhang kham chu ni! Thil thar a lo chhuak, an uar em em, a daih rei si lo, kan han nei ve chiah a thing leh hman, he hun hrep hi kan um pha ve ngang lo a ni ber e keini chhung hian. Ka nin em em chu: Thil thar lo chhuak kan er far far laia a thar dang lo chhuak leh vettei thin hi a ni. Thenkhat lah hi an buaithlak khawp, tunlai incheina kan tlin loh avanga kan neih ang tawka kan inchei lahin ‘thing ’ min ti a, neih lung khawnga a tunlai deuha kan inchei lahin ‘dinhmun nena inphu lova inchei ’ min ti leh si!! A buaithlak a ni ber e – Hei ha!! Hui ha!! He sum to sum problem avang hian ka zirchhuah pawh ni maih lo, miten degree duhawm lo tak, ‘mi rethei ’ tih chu min pe a, lungawi lo viau mah ila eng ka ti thei chuang si lo. Lungawi lo takin, lungawi takin ka pawm zam ta mai a ni. Engpawh nise, sum ka ngah ve hunah chuan ka degree duhawm fahran lo tak hi paih bo a lo ni tawh ang a, sum avangin ka Hei ha!! Hui ha!! tluk tluk tawh ngai lo ang a, chutah chuan ‘sa duh ’ kohhran ka din ang a, President chuh turin ka campaign nghal bawk ang.