Tunlai Internet khawvela Google leh Facebook innek dan vel hian mithiamte titi a ti-tam hle. Khawvel Internet ram awptu Google hian Web khawvela a ramluah tam tak chhuhsaktu social network thang chak tak Facebook hi a a huphurh ta hle a, kum 2010 laihawl vel atang tawh khan theihtawp chhuahin hma a la fan fan tawh a ni.
August ni 25, 2010 khan Google chuan Skype (Make the most of Skype - free internet calls and great value calls) eltu tur – Gmail hmangtuten email inbox atanga landlines leh mobile phone call theihna a tichhuak a, Gmail hmangtute tan free voice and video calls a tichhuak leh bawk a, chu mai bakah Google Buzz pawh a tichhuak leh bawk a nih kha. Tin, a neihsate siam tharin thil dang dang a tichhuak thar zel bawk. June, 2011 khan Google chuan thlalak awlsam zawka zawn theihna, thlalak hming chhut/ziah kher ngai lova thlalak awlsam taka zawn theihna leh mahni thil zawn duh ziah/chhut kher ngai tawh lo, tawng hmanga Google Search khawlpui-a awlsam taka duh duh zawnna a tichhuak thar bawk. Kum tam a liam hma-in computer hmangtuten mouse leh keyboard hmanga chhut leh kawh buai kual vel tul tawh lovin, kan aw hmangin kan computer te kan thunun mai thei tawh dawn niin a lang.
Tunah pawh hian Google chuan social network the Google+ (Real-life sharing, rethought for the web) tlangzarh theih thuai turin hma a la mek. He Google+ hi social network hman nuam tak tur ni tura duan niin, changkang leh nuam tihna tur tha zeta duan - Home, Profiles, Photos, Circles, Sparks, Hangouts te a tel ang. He Google Plus (Google+) lo chhuak tur hian Facebook hmangtu tam tak a lak pen theih rin a ni a, a bik takin rimawi ngainatute tan Google+ hi a hlu lehzual dawn, niin uluk taka thlithlaitute chuan an sawi.
Google-in uluk taka a duan social network lo chhuak tur Google+ hi tunah hrih chuan thlan bik mi tlemte chauhin an la hmang a, khawvel mi zawng zawng hman theih tura tlangzarh thuai a nih tur thu, Google chuan a sawi. Tunah hian he Google+ thiltum-ah hian inpek theih reng a ni. Hetah hian:- https://plus.google.com/
Google chuan tunlai hian a thil neih thenkhatte Google hming puttir tumin hma a la mek bawk. Thlalak dah khawmna lar tak 'Picasa' chu 'Google Photos' tia thlak a tum a, 'Bloggers' pawh 'Google Blogs' tia thlak a tum bawk a ni. Mahse, 'Youtube' erawh 'Google Videos' tiin emaw, hming dangin emaw thlak a tum lo thung.