GEO-TECHNICAL REPORT ATANGA A LAN DANIN AIZAWL-AH HMUN HLAUHAWM ZUAL PAKHUA A AWM

Geology & Mining Wing, Industries Department-in kum 1980 atanga 2007 thlenga Aizawl khawpui leilung dinhmun a zirchianna, tun hnaia a tlang-zarh tak ‘Geo Technical Report’ atanga a lan dan chuan Aizawl area-ah hmun hlauhawm bik (very high risk) pakua a awm tih tarlan a ni.

Zirchianna hian Sq. Km 128.98 chhung a huam a, vansang atanga satellite thlalak leh a hmun ngeia zirchian (field check) an neih atanga he report hi siam a ni.

He report buatsaihtu Dr. H.Lallenmawia, Jt. Director, Geology & Mining Wing in a tarlan dan chuan, a ram awih tlan dan te, a ram leilung inrem dan te, ruah leh tui luan kawr awm dan atang te, leimin awmduhna leh lirnghing kawng awmdan atangte-in hengte hi tehchhuah a ni.

Hmun hlauhawm zual (very high risk) hmun nia Electric sihpui veng, Ramthar veng, Venglai, Hunthar veng, Aizawl chhim hlam hmun thenkhat, Zemabawk kawng, Saron veng, Assam Rifles camp, Khatla leh South Hlimen quarry bawr a ni. Heng hmunah te hian hriatlawk theihna pawh awm vak lova lirnghing, leitawlh te awm thei tur a ni a. Aizawl hmun thenkhat pawh enkawl danin a zir loh chuan very high risk group-a awm thei a awm nual bawk. 

Hlauhawm khat (high risk) group zingah chuan Tuikual lui/Khatla lui, Khatla leh Maubawk kawng, Aizawl Theological College hmar lam, Vaivakawn leh luangmual inkar kawng hmar, Sairang lam kawng chung phei, Melthum leh Hlimen thlang lam pang, Bethlehem veng, Saron veng, Ramhlun phei leh Zuangtui Power Station bawr te a ni. 

Hmun pangngai leh hlauhawm lo (low risk/ moderate risk) zingah chuan Chawnpui veng leh Zemabawk laili vel leh Aizawl main road phei hi tarlan a ni.

Hmun hlauhawm lo (no risk zone) zingah Mual-pui ram te, Chite lui te chu tarlan a ni a, Aizawl pum-pui-ah hian no risk zone hi hmuh tur a tlem hle niin tarlan a ni bawk. 

He report-a tarlan dan chuan Aizawl khawpui zauh zelna atan chuan Luangmual lam chu a tha bera ngaih a ni a, a chhan chu a ram awih dan (slope) a that bakah lei chhungril khichat (fault) a tlem deuha hriat a ni a, amaherawhchu, he report-ah hian chiang taka zir chian a ni lo thung a ni.

Zirchiangtute thurawn-ah chuan Aizawl leh Mizoram chu hmun awih, ram naupang leh nghet lo, tui luan dan mumal lo a nih avangin building lian pui pui sak loh a that thu tarlan a ni a, building lian sa tur pawhin ft. 15-20 vel tala thuka ban khur laih tur a nih thu leh Aizawl atan chuan Assam type building ang chu a that ber thu tarlan a ni.

Aizawl-ah hian tui-luan kawr (drainage system) a that loh avangin Hunthar leh Electric Sihpui ruam te chu hmun hlauh-awm a chan phah niin tarlan a ni a, kopang laih san lutuk te, mual inkhawh laibun te chuan hmun hlauh-awmah a siam thei nia tarlan a ni bawk.

Heng venhim hna thawk tur chuan retaining wall siam te tui luankawr tha zawk siam te leh in rit lutuk sak loh te chu thil pawimawh tak niin tarlan a ni bawk a ni.