Fuihna An Ning

- V.L. Awia

A hminga ziak ziak ve takah chuan thu nepnawi, chhangchhe te te thing chhe fawm takin ka fawm a, ka chhep awn satliah ve mai a. Tuah tham leh khukpui tham awm lo mah se, School naupang (University Student ) hruaituten thu ziak turin, final ka khelh ngat ngat pawha champion ka nih theih lohna huhliap ngei maiah, kei a kar min rawn sawm a. Ka lawm ngawt mai. Chuta an hruaitu thenkhatte thusawi, “...zirlai fuihna lam hawi chu ziak lo hram teh, a ninawm tawh...” tih chu rilruah a cham tlat nia.

Kan chenna khawvel hi zirna khelmual meter bithliah awm lova intlansiakna hmun a ni a. Mi hawi-her, mi chet-tlat hria a, mi nuih ruala lo hawihai mai lo turin sum, hun leh remhriatna sawm khawm tak meuhva inbuatsaih a tul reng a.

Zirlaite kan enkawl danah hian kawng thar dap a hun takzet a. A pawimawh lo ni hauh lovin an mamawh ber zinga mi sum leh pai kan sik chhuak tawp a. Thahnemngai taka zir turin, taima taka chhiar turin hawrawp puiin kan FUIH hlawm tawp. An thlawhhma en zuipui mang lovin kum tawp result chhuah dawnah zing tawngtaiah pass ngei turin Engkim Tithei hnenah kan ngen chiam a. A chang chuan finna tiak, a zung, a kungpuite dil hmaihin a rahchhuah dilte pawh kan ang deuh thin.

Nitin hna pui bera neih te, an zirna compound-a tum khat chauh pawh va dak lek lovin thurawn leh fuihna thu kan chhipchhuantir hnur a. An zirlai rih tawh vei nen, ring khamin thlek ngaihna hre lovin kan siam fo thin. Tuia lut hauh si lovin a liluhte sangha man tur lo kawh kual ruai ngawt hian ei khawp man  a har teh ang chu!

Dik tak chuan zirlaite hi kan mal tlattir ngawt a. Heti zawk hian ti dawn tai la; zirlai naupang nei chuan an zirlai engemaw chen hriatpuia inhnawmhnawih hi kan zirlai tur a nih a rinawm. Chuta tang chuan FUIHNA hlang hlawk lek mar tawp lovin thurawn belhchian dawl zawk kan fah thei ang a, an zirnaah awmzia thuk zawk kan nei ngei ang. Infuihna ai chuan thawhona hian nasa takin hna a thawk thei zawk fe ang. Min hmangaihtute pawh hian a-thawk-a-pitin awl lovin min hmangai thu sawi sek se ninawmah a kal viau ang. Zirlaite hian fuihna an dodal lova, an haw hek lo. Kan fah thahnem a, kan sawi tam luatah an ning mai a ni.