Egypt-ah Christian leh Muslim Buai

Ni 8 March 2011, Thawhlehni khan Egypt khawpui Cairo-a Christian leh Muslim intihbuaina-ah mi 11 aia tlem lo an thi a, mi 100 aia tlem lovin hliam an tuar.

Egypt-Cairo khawpui, Helwan bial chhunga awm Sol khua-ah Muslim hmeichhia leh Christian mipa chu an in-hmangaih(an inngai a ni awm e) a, chumi avang chuan Muslim-ho thin a ur hle a, Christian-te an inti-buai ta ni (Egypt-ah sorkar danin Christian mipa leh Muslim hmeichhia inneih a khap. Mipa zawk chu Muslim sakhuaa a inleh erawh chuan pawm a ni thung! ). Buaina avangin a hmeichhe pa leh a mipa pa an thi ve ve a ni. Muslim sakhaw vuantu hmeichhe pa chu kar kalta Zirtawpni(4/3/11) khan vui liam a ni a, Inrinni-ah Muslim-hovin Sol khuaa Christian Biak In pakhat an hal a, thinurna a so sang deuh deuh.

Ni 7 March 2011, Thawhtanni-ah Christian-te inpun khawmin kawng an zawh a, Thawhlehni-ah Christian 1300 aia tlem lovin Helwan kawngpui an dang chat. Tichuan, Muslim leh Christian inkar buaina chu a zual sauh a, lung leh petrol bomb nen te invawmin an inti-buai vut vut ta a ni. Sipai leh police ten he buaina hi chinfel tumin theihtawp an chhuah a, chung lam kapin silai an hmet puak dur dur bawk. Egypt-ah hian Kristian leh Muslim inkarah buaina a chhuak zeuh zeuh tawh thin a ni. Buaina erawh a reh mai dawnin a lang lo.

Christian-te chuan thil phut hrang hrang an siam a, chung zingah chuan – Biak In sak thatsak leh Egypt sorkarin dan lo anga Christian-te a enkawl thin chungchang te tarlan a ni. Egypt sokarna chelh mektu chuan he buaina avang hian mi 25 aia tlem lo a man tawh a, Christian-te hnenah Biak In a rang thei ang bera sak thatsak a tiam bawk a ni.

Egypt-ah hian mihring maktaduai 80 vel chengin, chu’ng zinga 90% vel chu Muslim an ni a, 10% vel chu Christian Orthodox an ni. Tun tum buaina chhuahna Sol khuaah hian mihring 50,000 vel chengin, chu’ng zinga mi 7,000 vel chu Christian an ni.

Tunlai tak hi mipui lungawi lohna avang Egypt president inhnuh dawh hnu, sorkar insiam mek lai leh Egypt hmeichhia-ten mipa leh hmeichhia, sakhua leh rinna, retheihna leh hausakna thlir hrang lo, zalenna dik taka duan dan dik awm tura an beih mek lai a ni. Egypt hmeichhia sang tam tak chuan Egypt ramah inthleina awm lo dan dik tak a awm theihna atan kawng an zawh vut vut a, kawng hrang hrangin hma an la mek a ni.

Kum 2008-a Egyptian Center for Women's Rights zirchiannaah, Egypt hmeichhia 83% leh Egypt ram chhunga khawsa ram dang hmeichhia 98%-in sex nen inkungkaih zarbuaina (sexual harassment) an tawk a ni. Egypt ram hi khawvela hmeichhiate zarbuai tamna ber ram pakhat a ni.

Thulakna: BBC, CNN, Al Jazeera, RFI, IOL