December leh Zonun

- Vanpeka

Thitin thla a ral a, khuangchawi thla a lo det meuh chuan, furpui hnuaia chhum chhah tak zing phui mup thinte an kiang zova, damdawi in pawh a lun zualpui chu a reh deuh duak a, boruak a thiang tan a, fur khawhnawm pik churh mai a reh a, thlasik ni eng mawi leh boruak thiangin ro a rel tan a, tlanghri leng leh thawhrimna phurritin min tinsan ta. Nula leh tlangval tan hun a zalen a, a engthawl bawk. Thian zaho thenkhat phei chuan vangpui kut hi kum tin khel lovin an hmang thin.

A ni tak a, nipui khaw lum huam huam leh mut tichhuak churh churh tukkhum ek lak ang maia kun ngawih ngawih lai leh hnungzang leh zak pawh luite hnar ang maia a tui hluam hluam lai hun, thutna apiangin pang tilum a neih vung vung hun chuan rei tak min kiansan tawh a, chu chauh chu a ni lo; hmanlai Mizo ral beih hautak ber nena khaikhin thin, “Ruahpui leh ral chu kan do pangngai ,” tia hreawm ti taka an lo do han thak thin, Solomon-a meuh pawhin ning taka, “Khawcheng leh hmeichhe an hmang chu angkhat an ni, “ a lo tih hial, fur chhe hun chuan min tinsan ta bawk a, heng bakah favang tang tam lai hun pawh um bovin a lo awm ta. Sahmulphah thla a lo her chhuak a, rilruin Mas lam a hawi tan a. Kawla favang ni chhuak chu siam zawh hlim ang sarin a lo eng sen phut mai le! Leilet thlawh lai han thlir ila, buh hmin tur a lo eng tan tawh a, vamur leh piteng an leng noh noh va, hawina lam apiang a mawi a ni ber. Kan hma lawkah Mas thla December chu ban phak rengin a awm tawh tih hai rual a ni ta lo. Nghakhlel takin December thla chu kan thlir a, a chhan sawi tur awm chiah mang si lovin, rilru hi a hmanhmawh zek zek tawh mai a ni. Mas thla hian Zofate nunah thu a sawi thuk hle a lo ni.

Kristmas hi a hlu a, mi tinin kan nghakhlel theuh mai. A hun thlen hma fe atangin rilru zawng zawngin kan lo ur lawk a, a thla ngawt pawh ngaisangin Sapramah phei chuan Good Morning tih aiah Sweet December an ti thin a ni awm e. Khawvel hmun tam zawkah chuan van sanga thlawk, thlawhtheihna zawng zawng hian a phurh tam ber chu Kristmas card a ni an ti nia.

Keini Zofae pawhin mi changkang zawkte tih angin Mas card inthawn chu uar tehchiam mah suh ila, December thla hi kan hlut ve hrim hrim a ni. December hi kan tawng ni chiah lo mah se, kan tawng ang chiahin kan hmang a, veng kiltina nu mawl ber leh pa mawl berte pawhin Mas thla a ni tih a hai lo. Zofate hian January thla atangin durbina en ang maiin, December thla hi kan thlir deuh vek a, vawk vulhtu pawhin December thlaa hralh a tum a, leilet leh kut hnathawktu chi hrang hrang pawhin December thla bawk hi an en ber a ni thin. Dawrkai leh hmeithai zu zuar chenin kan thlir thup mai. Sum tha uma khual zin pawhin December thla hi mahni khua theuhva awm hun atan hman a ni a. Kumpui lingleta kan thawh chhuah zawng zawng chhutchhuah nan kan hmang a, kan thiltih apiang hi December thla hian a tlang kan kawm thin. December leh Zonun hi a va inkungkaih tak em! Buh leh thlai dang pawh a haw vang lai, mi rethei ber tan pawh puar leh tlai hun a ni a, rethei ber ber pawhin tlin leh tlin lovin fate thawnhnaw thar kan leisak a, he hun hi nghakhlel takin kan thlir thin.

December thlaa Mas kan hmang kher hi a inhmeh hlein ka hria. Zofate tan hian a inhmeh lehzual. Kum 1945 (?) vel khan Myohla khuain buh seng zawh January thlaah Mas an hmang thin a, a nuam der lo an ti. Kohhran thenkhat pawhin September thla nawi lam emaw, October chawhma lam emaw nena inmilin an chhut a, chung hun vel chuan Mas an hmang a, a rem lo huin a hriat a, lung pawh a leng meuh lo a ni awm e. A ni tak a, December leh Zonun hian inzawmna thuk tak a nei tlat a, thla dang nen chuan a inrem thei meuh lo zawng a nih hi. Mas hi hlimna ni, ni bawk mah se, lunglen hun a ni ve tlat mai a, chuvangin December thla hian Zofate thlarau a pawl a, kan ngaihtuahna ramtla pawh December-ah kan chhung lut thin.

December thla kan han chuankai phat atangin rilruin Bethlehem lam a fang tan tawh a, nu lungleng thei deuh leh pa lungleng thei deuhte phei chuan an la hmuh ngai miah loh Bethlehem leh a chheh vel ram chu ngaiin, “Aw nang Bethlehem ka va ngai tak che em! ” an ti vawng vawng mai a ni. Mas thla a lo thlen meuh chuan Zofate thinlung leh ngaihtuahna chu Bethlehem lamah a cheng tlat tawh a, Zofate tan chuan “Bethlehem ngaih thla ” ti ta ila, a inhmeh zawk mah awm asin. Zofaten kan hun neih tam zawk hi December thlaa innghat a ni kan ti thei ang. Bethlehem ngaih thlaa hlimna ni ropui lo thleng tur chu nghakhlel takin kan thlir thup a, lailen leh chipte chenin an chenna khawlum chu rauhsanin mel sang tam tak atangin Zofate December boruak nuam tak chu an um lawm lawm zel a. Zanah lah chung lam han thlir ila, thlasik chuan lalna leh thuneihna a chan tawh avangin, kawngpui a lo sial ruah tawh bawk nen. Damhauhva pawhin hei hi a ni ang: “Zankhua a tiang thlasik kawng chuang si-ar pawl ruai e ,” a lo tih hial ni.

Khawdur bainam pawh awm lo khawpa khua a thian that em avangin, arsi pawh a lian a tein a pe un mai bawk a. Thlahleinga zan a lo thleng a, kawmthlangte in chung lawk atang chhuak ang maiin thla chu a lo lang a, “Zan lalnu ” tih pawh a phu reng a ni. Arsi te deuh erawh chu thla engin a luahlan tawh avangin, a lian deuhte chauh khat pharhin a lang tawh a. Thla chu a liam hma zawngin nung zawng zawngte lawm nan a eng zankhua ta a ni. He Bethlehem ngaih thla hi a ni ang Lal Davida pawhin “Vante khian Pathian ropuizia chu a hriattir a, boruak zau tak khian a kutchhuak chu a lantir thin ” a lo tih hial ni. He Mas thla hian mi tin ta tur Chanchin Tha a pai a, chu mi lo thleng tur chu nungcha zawng zawng pawhin an nghakhlel theuh va, nu leh pa titi tam ber pawh Indopui III-na lo thleng tur lamin hmun an chang tawh lo va; kan hma lawka Remna Lal lo piang tur lam hlir sawiin engtin nge kan hmauh ang tih leh kan faten thawmhnaw thar engtin nge an neih ang tihte chuan an rilru a lak pen hneh em avangin chu lam hlir chu an titi tui ber a ni tawh a. He hun ngei hi a ni Rokunga pawhin, “Kan vannei em e, lawmna ni kan tawng leh ta, lungrual takin hlimzai i vawr ang u; I lungngaihna chu puan ang hlip rawh,” a lo tih ni. He Bethlehem ngaih thla meuhah hi chuan AIR Aizawl pawhin Mas hla hlir an rawn tichhuak tawh a, khaw lai han leng ila, tape neiten Mas hla hlir an lo chhuah tawh a, rilru a phawklek zo ta.

Zanah carol zai mawi thawmin khaw lai a tuam vel a, khawvawt karah thalai rualten LAL thar lo piang tur hmuah nan:

Aw van angelho zai rite chuan,

Bethlehem dai a nghawr vel e;

An lawm hla ri zam velte chuan,

Immanuela Lal Chungnung ber rawh se an ti, tia rimawi chi tin hmanga an han awi dup dup mai han hriatte chuan thinlai mu hnu lunglen a kaitho va, mut hmun atang pawhin kan lo zawm lo thei lo a nih thin kha. Thalai rilru hawklak lai ngeite pawh hi he Bethlehem ngaih thlaah meuh chuan thinlung dang an pu thei meuh bik lo chu a ni.

Tunah chuan LAL piang tur inbuatsaih nan, thil zawng zawng peih fel a ni ta. December-in mi tin ta tur a pai chu zan thiang reh lai takin a lo thleng ta a. Van Lal Fapa chu leiah a lo piang ta. He Bethlehem ngaih thla hi a ni ngei ang Zikpuii pa pawhin: “Nang hi i ni ve ang, Remna Lal pawhin a rawn pan, ” a lo tih hial ni. Kan chenna in leh a velte pawh hi Lal thar piang tur hmuah nan December thla tir atangin i thianfai ang u. Biak in leh kan chenna in pawh hi mahni tlin tawk talin Mas thla tir atang chuan cheimawi a va tha tak em! December ni 20 hnu lama chei atan zawng a uihawm lu deuh.

Chhungkaw tinte pawh hian he Bethlehem ngaih thla-ah chuan mahni in chhung theuh rem lentir i tum ang u. Bethlehem ngaih thlaah hi chuan ni danga inhau thin pawhin sim tum ila, vui thu sawi nan te, intumkhum nante leh titauhna atante hmang lo hram ila, tawngkam kha deuh chu a bula mi lawk, tawngkam thlumin thlak tum bawk ila, hmel mawi lote pawh hlim hmelin thlak ila, “Chhanna nemin thinur a tikiang thin ” tih hi chang-vawnah neih theuhin mahni chhungkua leh thenrual lakah lawmthu inhrilh tawna lawmna chibai inbuk nan hmang ila, Remna Lal pian thla a nih ang ngeiin, remna leh hlimna atan hman i tum ang u. Tape kan hawn pawhin Mas hla hlir hawng theuh ila, Pathian biak inkhawmah pawh Mas hla hlir thlang ila, tichuan kan thinlung bawng inah REMNA LAL chu atakin a lo piang dawn nia. Chuti chuan December thla leh Zonun inkungkaihna pawh a lo nghet zual ang a, Zofate nunah mawi takin par a chhuang tawh dawn a ni.

(He thu hi Zawlkin Huiva 2002 by Mizo Student Fellowship atanga lakchhuah, thu tlem paih then a ni. – Ed. of Zotui Thiang)