Dawihzep Theology

-Dr.Lalchhuanawma Tochhawng

Tirhkoh Paula chuan, “Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk si a,” a ti a. Paula ngaisang awm tak tak zingah hlauh tur hre riau kan tam ngei mai.

Hmanah chuan computer hlau tlat, sakawlh emaw ti tlatte an awm a;  Synod lo hmu sakawlh tlat te, Sande sikula hming ziah ringawt pawh hlau tlat te, Kohhrana hming ziah luh hi sakawlh thurualpuina nia ngaia hlau tlatte pawh an awm thin. Nu pakhatin nitin sikula zirna hi sakawlhah a ngai a, patling pui puiin an awih a, an fate lehkha an zirtir lo ringawt tawh bawk a.

Upa tawngin, kan tleirawl laiin crusade an tihah hian ka kal ve a. Councellor chuan mihring dinhmun chhiatzia leh a hmabak hremhmun rapthlakzia a sawi vak a. Hremhmun rapthlakzia kha min sawithaih a, hremhmun hlauh vanga mi tihpianthar a tum a. Kei pek lah chuan, “Hremhmun ka hlau ve hlei nem!  Chatuan meipuia min paihthlak ka ring lo va. Kan kang ral ang a, kan ral hlen maiin ka ring zawk,” ka lo ti khauh mai a. A thin a rim ta, “Hremhmun hlau lo chuan pianthar i duh lo a nih chu,” a ti a, min kalsan daih a. K|P Leader a lokal a, Pathian hmangaihna thu a rawn sawi ta a. Chu erawhchu ka pawm thiam zawng tak a ni ta a.

Mi thenkhat chuan hlauhawm hmangin ram an la. Hlauhawm an zawng chawp a, an siam chawp a. Chu chu an hmin theih zawng apiang an hrilh a, an hmin a.  An hmin ta maw tihah chu hlauhawm phuahchawp atanga himna awm chhun chu an pawl emaw an zirtirna emaw kha a ni an han tizui leh a. Pawl ram lakna leh mahni ram lakna atan an hmang thin. Mi thenkhat phei chuan sumdawnna atan an hmang emaw tih mai tur a ni. Nibiru/planet X pawh hi a hlauhawm thei ang berin an han sawi te te a, chumi laka him theihna chu lehkhabu leh CD in an han zuar zui a. An hausak phah lawih mai a. Mi sumdawnna chu Mizorama Pathian Thuhril mi thenkhatin pulpit tlangah thutak sawiin an sawi a. An thusawi miin an awih theih nan ti niawm takin mipui an han sawithaih thin a nih chu. Hei hi mi dawihzep theology chu a ni ber e.

Sakhuaah hian mitinin zalenna kan nei a, kan duh duh kan ring thei a. Kan duh duh kan hlau thei. Amaherawhchu sakhua a nih avanga India sawrkar hmalakna dodal erawh chu a thiang chuang lo va. Sakhua a nih avanga mipui tithlabar zawnga hrilhlawkna eng eng emaw lo siam ve ngawtte hi a dik bawk lovang.

Sakhua a nih tak avanga rilru fim leh ngaihtuahna thiang a bo tlat thin hi mak ka ti tawp thei lo. Sakhuana behchhanin, ‘chumi kha mi niah lir a nghing dawn, kum 2012-ah Nibiru a lo thleng dawn, chu chu a hlauhawm, khi khi a hlauhawm etc,’ an ti a. Dawt leh thutak thliar thei tura Pathianin rilru min pek hi a nih ang taka hmang ngam tawh lovin kan awih dual dual mai a. A mak a ni. Hetianga ngaihtuahna f$m a bo tlat thin avang hian vawiin thleng hian ‘number’ mai mai hlaua chai vak tawk kan la nei a nih hi.

Hnam tin hian mawl lai hunin hlauh tur an ngah a; hlauhna hmangin an inthunun vek thin. An sakhua pawh thlarau sual hlauhnaah a innghat thui thin hle. Finna a lo pung a, hriatna a zau zel a. Hlauhawm emaw an tih thin kha a hlauhawm loh tih kan hre chhawm zel a. Chuti chung chuan hlauh ngah fe fe kan la nei fo mai.

Kum zabi sawmhnihna kan chuankai hnu meuh pawhin hmanlai mi te sakhua anga hlauhawma innghat zirtirna kan la hre fo mai. Kan Pathian biak theuh hi a betute khawsazia atanga chawhchhuah tur ni se la, biak tlak mang loh pathian ka hmu nual awm e. Thubelh chian dawl lo hmanga mipui thlabarna siam thin te, sawrkar programme lo do tlatte hi thubuai siamsak mai theihna dan awm se a tha hialin ka ring thin.

Thulakna: Vanglaini