College rintlak loh chhuichhuak

Aizawl-a nitin chanchinbu pakhata advertisement chhuak ringhlela MZP ten First Information Report (FIR) an thehluh hnu-ah, Global Open University hnuaia Shri Shankara College, Guwahati anga inzuar chu police ten college rintlak loh niin an chhuichhuak.

 Thudawnna sawi dan chuan Aizawl-a he college advertisement hmanga zuartu hi Jennifer-i, Hailakandi-a awm thin nia insawi a ni a. He college-a admission buaipui manah hian mi pakhatah Rs.2,000/- hlawh turin a tirtute chuan an sawi a, admission lo ti hman pakhat chuan  admission fee a lo pek tawhte pawh a ‘withdraw’ leh tawh niin hriat a ni.

 He college hian course hrang hrang atana admission fee a phut te hi Rs. 50,000/- atanga Rs.80,000/- inkar vel a ni a, he thil hi ringhlelin MZP hruaituten Aizawl SP hnenah chhui chiang turin an ngen a ni.

 Guwahati-a he college awm anga sawi chu MZP hruaituten Assam-a an thawhpui zirlai hruaitute enfiahtirin, anni hian building pawh nei mumal lo, office hmun chep tak pakhat ang lek niin an sawi a. “Guwahati-ah hian a enfiah tur lamkal kan intir mek,” tiin MZP general secretary H.Lalremsiama chuan a sawi.

 He college-a zir hun chhung rei loh chhan te MZP hruaituten an zawhfiahnaah Jennifer-i hian an ‘back date’ mai thin thu admission ti tawh hi pahnih niin a sawi a, police-te hnenah chuan pakhat chauh niin a sawi, MZP general secretary chuan a ti bawk.

 MZP ten FIR an thehluh hma hian CID lam pawhin ringhlelin a lo chhui tawh a, a hranpaa thubuai ziaklut loin chhuizui a ni a, chhuichhuah a nih takah hian engtia kalpui zel tur nge tih  MZP chuan vawiin hian an ngaihtuah dawn nia hriat a ni.

Thulakna: The Zozam Times