CM-in Dan A Thiat

Chief Minister Pu Lal Thanhawla chuan Mizoram Technical Entrance Examination (MTEE) result vawihnih tihchhuah tawha dik lo la awm fo chu tihdik nan naupangte exam nawntir lovin an chhanna ennawn a ni ang tih a sawinawnleh a, ennawnleh hi a harsa tawh lo ang a ti. A ennawn turte-ah hian an rinawm lo tihna ni lovin a ngai hlir hman an nih chuan an serious tawk lo tite an awm theih takin an zingah sawrkar mi rin zawngte an tel ve dawn a ni a ti.

Nimina Chief Minister’s Secretariat-a chanchinbumi thenkhatte nen an inkawmnaah Chief Minister chuan a dik lo tih hmuhchhuah a nih avangin ennawn a ni dawn a, mahse, ennawn hi a hmanhmawhthlak em emah chuan an ngai lo a ti. Parliamentary Secretary Pu Chawngtinthanga chuan Mizoramin technical course zirna quota a neihnate an zawh kualin admission tihma ber RIMS, Imphal chuan July chawlhkar tirah admission an lo ti thin a ni a ti.

Chief Minister chuan Mizoram (Selection of Candidates for Higher Technical Courses) Rules 1990-a exam chhannate ennawn theih loh tih dan chu dan tlanchhia/dawihzep a ni tiin he dan hi a thiat tawh a ni a ti a. Sawrkarin he dan thiatna hi nimin piah lamah khan order a tichhuak tawh a ni a ti. Result ennawnah hian engmahin a dal dawn loh thu a sawi. Pu Hawla chuan he dan tan chhana zirlai nu leh pa thenkhatten result dik lo lai ennawnleh an do chu result hi a dik lo chung chunga pawm turin sawrkar an duh tihna em ni tiin a ngaihtuahtir a ni a ti a. Thil dik an duh lo em ni tiin an ngaihtuahna a dik lo a ni ang tih a hlauh thu a sawi. Pu Hawla hian Brochure phek 28 chauh Rs.400-a lo hralh a to lutuk tiin a chhutu, chhutna, chhut zat awm lo pawh endik a ngai dawn a ni a ti.

Thulakna: Mizo Aw