Ni 10 chhung awh tur Best of Asia Expo 2010-International Border Trade Show, Aizawl, Lammuala neih tur chu inrinni khan hawngin Pu Hawla chuan India ram kilkhawrtak Mizoramah ram dang mite pawh tel vena International Border Trade Show, Aizawla neih hmasak ber tur buatsaih a ni chu lawmawm a tih thu a sawi a. Mizo thalaite leh hetiang lama tuimi te tan hlawkpui tham a nih ngei a beisei thu a sawi.
He Expo hi Kolkataa Nirvana Pilgrims Society bultumin Mizoram Entrepreneurship Network (MEN) buatsaih a ni a. Tun hnai maiah khan Bhutan, Nagaland leh Manipurah an nei tawh a ni. He Expo-a stall hawng turin India ram hmun hrang hrang leh Thailand atangtein an rawn thleng tawh a. Bhutan, Myanmar, Cambodia, leh Turkey ram atangtein an lo la thlen beisei a ni. Stall chi hrang hrang tam tak hawn tur zingah Thailand atang ringawt pawhin stall 20 a awm dawn a ni.Heng stall bakah hian Union Ministry of Health & Family Welfare chuan free clinic rawn siam bawkin Ayush lam stall an rawn hawng bawk ang.
MEN hotupa Pu Joseph Ralte sawidanin, hetiang thil buatsaih a nihna chhan chu Mizorama international event chhawpchhuah hi Mizote tangkaipui tur nia an hriat vangte, MEN ten inpholanna hun remchang nia an hriat vang leh MICE ( M-Meeing, I-Incentive, C-Convention, E-Exhibition) tourism awm theih nana hun remchang lo siam a ni a ti.
He Expo neih tur hi inpeih lo chungchunga hawn a ni a. Stall thahnem tak la siam tur a awm a, siam mek zel a ni bawk.Chief Minister hi a nupui Pi Lalriliani bakah Trade and Commerce Minister Pu Lalrinliana Sailo ten an tawiawm a ni
Thulakna:Mizo Aw