CM hoin Jessami Day hmang

27/03/2010 20:21

VANGLAINI : Indopui II-na hunlaia Nagaland leh Burma inrina hmun, Jessami a Mizo 200 chuang awmna 1st Assam Regiment sipaite'n Japan sipaite ni nga chhung an lo danchahna hmun, Mizo sipai 54 chuang thihna hriatrengna ni ‘Jessami Day’ cum Ex-Servicemen Reunion, chu Mizoram Ex-Services Leaque buatsaih Vanapa Hall-ah Chief Minister Lal Thanhawl hoa hman a ni.

Chief Minister chuan rinawm tak leh huaisen taka an tih tur an hlen thin avangin sipaite'n Mizote hming an tih tha thin thu sawiin, "An chhuanawm takzet a, an hnen atang hian thangtharten chhawm tur leh hriat tur kan ngah hle a ni," a ti.

Lal Thanhawla chuan Mizo thalaite sipaiah lut tam se a duhthu a sawi a, Chhingchhipah Sainik School remchang hmasa berah din a nih tur thu a sawi bawk; Lalrinmawia Ralte, Parliamentary Secretary (Home) pawhin thu a sawi.

Chief Minister hian lehkhabu ‘Ral Hmaa Zam Ngailo’ tih, Hony Capt Boilora chanchin H.Kaphlira ziah a tlangzarh bakah Indonaa thi te nupui, veterans leh mamawh zual bik sipai bangte hnenah thilpek a hlan nghal a ni.

Mizoram Ex-Services Leaque ‘Jessami Day’ cum Ex-Servicemen Reunion, lawmna tan hian Mizoram Ex-Services Leaque chuan Vanapa Hall-a hun an hman bakah hian zing karah Indonaa thite thlan, Treasury Square-ah hun an hmang a, tlaiah Lammualah chawhlui an kilho bawk a ni.