Chiahpuam chhui zo thawkhat Mi 9,759 inrawlh; pawisa che vel vbc. 433

VANGLAINI : Mizorama pawisaa inbumna lian bera ngaih, Chiahpuam an tih mai chu police-te'n an chhui zo thawkhat. Chiahpuamah hian mi 9759 inhnamhnawihin, pawisa che vel chu Rs. 4,33,80,24,066-a chhût a ni a, Rs. 730,51,853 hmuh let niin, bungrua lilamna nena sum hmuh lêt zawng zawng chu Rs. 2,51,43,352 a ni.

Chiahpuamah hian FIR atanga a lan danin, pawisa che vel zat hi Rs. 3,49,25,55,140 a ni a, mahse police-in an chhuina atangin Rs. 4,33,80,24,066.38 a che vel tih an hmuchhuak. Collector leh agent-te'n pawisa an khawnkhawm hnua an pek chhuah leh hi Rs. 94,96,81,212 niin police-te chuan an hria a, sum la bâng leh buai (involvement) chu Rs. 3,38,83,42,854.38 niin an chhui chhuak bawk.
He buainah hian pawisa khawntu (collector) 985 leh pawisa dahtu (depositor) 8,774 an awm a, inhnamhnawih lian zual mi 45 chu manin, tunah hian bail-in an chhuak leh vek tawh a ni.

Chiahpuam kaihhnawiha police-te'n lirthei an man zat chu - two wheeler - 14, WagonR - 5, Alto car - 3, Indica car - 1, Getz car - 4, Maruti van - 2, Scorpio - 2, Swift car - 3, Zen car - 2, bus - 3, Fiat car - 1 leh Maruti car - 2 an ni a; heng lirtheite hi tihral tawh niin, an vaia a hlut zawng chu Rs. 71,14,876.99 a ni.

Pawisa fai ni lo, thil chi hrang hrang police-in an man leh an hlut zawng chu - Saving Account 59 hlut zawng - Rs. 12350523.41; Bank cheque book 35 hlut zawng - Rs. 5846321.98; Bank cash credit pali; ATM card pariat hlut zawng Rs. 20,212; Insurance policy 19 hlut zawng Rs. 7,58,91,914; LSC 46 hlutna Rs. 7,57,05,000; cash counting machine pathum hlutna Rs. 1,20,000; TV pakhat hlutna Rs. 12,000; rangkachak thi pahnih hlutna Rs. 27,463; rangkachak zungbun pathum hlutna Rs. 9,381; mobile phone handset 18; refrigerator pakhat Rs. 2,5000; diamond ring pakhat Rs. 27,000; intiamkamna (sales deed) pakhat Rs. 7,56,000 leh, Laptop pakhat Rs. 39,000 te an ni a; a vaiin Rs. 10,68,844 hû a ni.

Police-te thil man zawng zawng hlut zawng chu Rs. 17,53,44,551 a ni a, sum faia hmuh lêt Rs. 8,01,66,729 chu Magistrate hriatpuiin bank-ah fixed deposit-a dah a ni. Sum che vel zawng zawng Rs. 433,80,24,066.38 atangin agent-te'n depositor hnena interest an pekchhuah chu Rs. 94,96,81,212 a ni a; sum la hmuh loh leh bungraw hrang hrang suma la chantir loh Rs. 3,38,83,42,854.38 chu a bo anga chhûtin, Rs. 3,30,81,76,125 chu chhuichhuah zawh a ni lo.

Chiahpuam changchangah hian October 30, 2008 khan Aizawl Police Station-ah case register a ni a, case hi 17 register a ni. Case chhuina hi police-te'n February 12, 2010 khan Chief Judicial Magistrate, R Vanlalchami Court-ah an thehlut tawh a, mahse Court chuan a la ngaihtuah rih lo.

Court-in Police report a ngaihtuah chuan, he thubuai hi dik lo taka sumdawnna a nih avangin depositor-te pawhin pakhatmah chang lêt loin, sorkara chhûn luh tur chi a nih thu Ukil pakhat chuan Vanglaini a hrilh a; Court-a rel fel ai chuan, depositor-te leh agent-te'n inrem taka an chinfel a, sum hmuhchhuah atanga percent-a an insem a that zawk a rin thu a sawi bawk.