Chhim Korea-in Tui Lam Ralbeih Zir Insawizawina Nei Leh ( Chhim leh Hmar Korea Buaina Kal Zel )

Ni 5 August 2010, Ningani – chhim Korea chuan hmar Korea hnena a chakna entir nan , tuihnuai lawng nen inkungkaih sipai indo zir insawizawna chu Yellow Sea-ah  a nei tan. Ni 5 awh tur he sipai insawizawina  hi chhim Korea-in sipai insawizawina a neih tawh zingah chuan a la nasa ber tura ngaih a ni a, sipai 4500 , lawng lian leh tuihnuai lawng 20 aia tlem lo leh ralbeih thlawhna 50 te an tel ang.

Chhim Korea hian July thla khan US nen tangkawpin van sang lam leh tui lam indo zir sipai insawizawina a lo nei tawh a, he’ng sipai indo zir insawizawina pahnihte hi ni 26 March 2010-a hmar Korea-in  chhim Korea lawng a kah pil chhan let nan (vo nan) a neih a ni.

Hriat kawp tur :-

US leh Chhim Korea te Chhanlet Nan China-in Van Sang Ral Beih Dan Zir Insawizawina Nei

Ni 3 August 2010 : China chuan “Vanguard-2010” tih hmingpu van sang lam ralbeih dan zir insawizawina a hmang tan mek a,ni 5 awh tur  he rel beih zir indo fiamna hi chlawhkar khat vel kal ta (ni 25 – 28 July 2010)-a US leh chhim Korea te tui lam leh van sang lam ralbeih insawizawina an neih chhan let nana neih a ni.

Tun tum China van sang lam beih thut laka inven dan zir insawizawina-ah hian lei lam sipai leh tui lam sipai 12000 aia tlem lo, thlawhna , ralbeih thlawhna , helicopter 100 leh van boruak missiles laka invenna leh ralthuam dangte hman a ni.

China hian chawlhkar khat vel kal taa Tuipui eng (yellow sea) leh Japan tuipui-a America leh chhim Korea ram  ,tui lam leh van sang lam ral beih dan zir insawizawina (indo lemna ) an nei kha a helh em em mai a, tunah a chhanlet nan hetiang hian a nei ve ta a ni.

US - Chhim Korea Ralbeih Insawizawina leh Hmar Korea (Buaina)

March 2010-a mi 46 thihna chhim lam Korea ral beih lawngpui pil avanga  chhim Korea leh hmar Korea inepna nasa  chho hret hret zelah US chu chhim Korea lam a tang tlat a ni, tih entirnan ni 25 – 28 July 2010 awh Tuipui eng (yellow sea) leh Japan tuipui-ah America chu chhim Korea ram nen tui lam leh van sang lam ral beih dan zir insawizawina (indo lemna ) a nei a. America thian tha Japan pawhin he insawizawina zirchiang tur hian a sipai 4 a tir bawk.

March thlaa chhim Korea ral beih lawngpui pil chhan International investigation team-in a chhuina thuchhuak – hmar Korea-in a kah avanga pil a ni, tih chu hmar Korea hian a hnawl ve tlat a.Tin, hmar Korea chuan US leh chhim Korea ralbeih insawizawina neih hi vo-in, a tul a nih phawt chuan hmar Korea hian Nuclear Indona tan a inpeih reng thu a sawi.

Hetih lai hian White House chuan hmar Korea thusawi chu a ngaih pawimawh loh thu leh chhim Korea puihbawmnaa  a  thiltih chu tlang taka a kalpui zel thu a puang ve bawk.Tunah hian chhim Korea leh hmar Korea te chu ralthuam chi hrang hrangin an in tin fur leh tawh a ni.

America leh chhim Korea ralbeih zir indolemnaah hian USS George Washington ralbeih thlawhna phur lawng lian leh lawng lian dang leh tui hnuai lawng 20 , thlawhna 200 leh sipai 8000 an che vel a ni.

Thulakna: Los Angeles Times , The New York Times , CNN , Al Jazeera