Chhiarpui-a tel duhlo chhungkua 39 awm belh

Mizoram-a Chhiarpui (Census) neih mekah chuan Sakawlh intanna a nih ringhlela inziaklut duh lo Chhiahtlang-ah chhungkaw 30 leh New Serchhip-ah chhungkua 9 an awm nia thu dawn a ni a. Helai bialah hian chhiarpui thawhkhatna hi zawh a la nih loh avangin Chhiarpui-a tel duh rih lo zat dik tak hriat theih a la ni lo.

Serchhip-ah hian Nilaini khan DC’s Meeting Room-ah Sub-Hqrs. YMA leh Sub-Hqrs. MHIP hruaitute leh chanchinbumite tan Chhiarpui leh National Population Register (NPR) hlauhawm lohzia chungchang training neih a ni a. District Bawrhsap H.Darzika’n hmanpuiin,  Charge Officer Thanzira’n Census/NPR awmzia leh kalpui a nih dante a sawifiah a ni.

Charge Officer chuan Census-ah hian  mihring awm zawng zawng chhiar tur a nih laiin, NPR-ah chuan pawikhawih thei rual, kum 15 chin chunglam chauh ziahluh tur a nih thu a sawi a. NPR atana kutzungtang thlalak leh number pek chungchang chu mithenkhatin an hlauh chhan ber a nih thu sawiin, chhungkaw khat, ngaihdan inanlohna an awm nual tih a sawi bawk.

Hetih lai hian Chhiarpui leh Sakawlh inzawma ngaia Chhiarpui-a tel duh lo tawp an ni lo tih Serchhip atanga thudawnna pakhat chuan a sawi a. “Tun tum Chhiarpuia thil kalpui dan hi Sakawlh bul intanna a ni thei em tih kan zir ve mek a, kan tel duh rih lo mai chauh a ni,” tiin Chhiarpui-a la tel duh lo zinga pakhat chuan nimin khan The Zozam Times a hrilh.

--------------

 Chhiarpui 2011 hi Mizoram-ah chuan May ni 15 atangin a thawhkhatna kalpui an a ni a, hetah hian House Listing tih phawt a ni dawn a, June ni 30-a zawh hman tura ruahman a ni.

Chhiarpui thawh hnihna chu February ni 9 atanga ni 25, 2011 chhungin neih a ni leh ang a, mihring chhiarpui neih a ni ang.

India ram pumah NPR atan Rs. vbc 3539.24 vel seng tur anga chhut a ni a, mi tluklehdingawn 1.2 vel cover tur anga chhut a ni.

Thulakna: The Zozam Times