CHERAW KAN TUR 10832 TLING TAWH

06/03/2010 14:56

Mizoram sorkar Art & Culture department huaihawta Cheraw Kana world record siam tura inbuatsaihna chu ngawrh takin a kal zel a, nimin thleng khan bu 677 kân turte'n an tel tur thu an tichiang a, mi 10832 an tel dawn a ni.

Guiness Book of World Record-a lang tura Cheraw Kan buatsaih endik tur hian London atang a endiktu tur hmeichhia, Lusia Sinigagliesi pawh March 10 khian a lo thleng dawn a,Mizoram sorkar aiawh James Perry pawhin March 8 khian Aizawl a lo thleng ang.

March 12 chawhnu dar 2-a Cheraw Kan runpui neih tur atan hian chhun dar 12 atangin rehearshal neih a ni ang a, March 8 chawhma dar 10 atangin AR lammualah Lam turte'n mau lak theih a ni ang.Lam tur zingah hian Gilead Special School-a vohbik naupangte pawh an tel tur thu Art & Culture Director Boichhingpuii chuan Vanglaini a hrilh.

AR Lammual-ah sound control-na an bun ang a, Bazar Bungkawn leh Sikulpui kawn inkarah lam turte'n a rual thapa music an hriat theihna turin ruahman a ni a, a rual veka an lam theih beisei ani.Ruahman ang chuan AR Lammualah hian bu 141 an lam ang a, a bak zawng chu kawngpui dungah an lam dawn a ni.

March12-a lam runpui zawh hunah AR Lammualah London atanga lo kal Guiness Book of World Record aiawh chuan result puangin a lawmna neih nghal a ni ang a, chumi zawh chuan press conference a nei nghal ang.Thulakna:Vanglaini