Cheraw (Bamboo Dance) for Guinness World Record Atang Mizona

-Zotuithiang

Ni 12 March 2010-ah khawvela a ber kaite ziakna bu-a chuang turin Cheraw kan (Bamboo Dance tia an lehlin tak) kan zirho vut vut a.Kan phur tlang hlawm a,a hun thlen hlan kan nghakhlel hlawm takzet.

"Cheraw kan" hi "Bamboo dance"tia hman chungchangah mi tak zawk chu kan lungkim chiah lo niin a lang.Engpawh nise, "Bamboo dance" tih sirah "Cheraw kan" tih hi lang tel zel hram hram sela,tin "MIZO" tih hi lang zing hlur bawk sela.Chutianga ngaihthiam hram hram chu kan tihtur a ni ta.

Thian thenkhat ram danga awmte an sawi fo thin - "Kumin Chapchar Kut zet chuan Mizo nih nawmna a keng tel chiang mai.Cheraw kan-a Record siam tumna te, lungrual tak maia Mizo thalaite an han kal rual thap thap mai han hmuh hi chuan, Mizova tui tha duh lo ho leh min do tlattute hian sawi tur an hre ta meuh lo...." tiin.

Heti zawng hian thlir ta ila : "Bamboo dance" tih hman a nih chungchanga kan phun fo mai hi,Mizo hnam tana kan thahnemngaih luat vang a ni a,thil tha tak a ni.A hnam pum huapa phur tak maia kan inbuatsaih luih luih chhan hi kan hnam lam mawi tak mai khawvel hriattir a,khawvelah Mizote hnam pakhat ang taka kan lanchhuah ve theih nan a ni a,chumi-in a ken tel chu " kan Mizo hnam hi kan hmangaih a ni " tih hi a ni.Hetianga Mizoram mite an inbuatsaih vut vut hi Mizoram mi ni lo,ram danga awm Mizote pawh an lo phur a,Mizo nih nuam an ti deuh deuh tih a chiang.

Awle, a chunga kan tarlan chhun atangte khian "Ram leh Hnam tan" a tilang chiang hle a ni.Ram dang mi leh hnam dang miten min thlir ve thup reng a,chu'ng mite mithmuha Mizote kan lan mawi dan tur zia te hi ka ngaihtuah nasa thin.A hnam tam leh tlem zawnga tehin - hetianga a huhova tan la vut vut hnam, a huhova lam rual vut vut hnam hi khawvelah awm ve ngai tak maw?!!Mizote hian kan Mizona rilru kan la hloh lo a,kan theihtawp chhuaha Mizo hnam tan,Mizoram tan tan lak hi kan rilru-ah a awm reng a ni.

Mizo takin,lungrual takin kan kal zel dawn.