Chemtatrawta

Hmanlai hian Chemtatrawta an tih hi a awm a, ani chuan an chenna thlang lawka tui tichip chiapah chem a tat rawt rawt a. Chutia chem a tah lai chuan Kaikuangin a sazu-ah a chep ta hlawk mai a, na a ti hle mai a.

Chemtatrawta chu a thinur a, a kianga Kha-um zamna rawpui a sat fik zawk a. A hnuaia Ramar tla chu a ngumah a deng khawl mai a.

Tichuan Ramar thin a ur a, Taivang bu a thai darh ta vak mai a. Chutia an bu a lo darh tak vek avang chuan Taivangte chu an thin a ur a. Sanghal chu an seh rawn ta chiam mai a. Sanghal pawh chu a thinrim ta em em a. Taivang thin a ur a, Sanghal kapah a seh a; Sanghal pawh a thinur a, Bak awmna changel a nghovin a tai tlu ta pheng phung a. Changel hunga lo tawm Bak chu loh theih lohvin a thlawk chhuak ta a.

Chutia Bak thlawk chuan tawm himna hmun thim tha panin Sai hnarah a thlawk lut ta a. Sai chu a thinurin a mangang ve ta hle mai a, a phi ruai a. Pitarte in a chilchhia a, chu Pitar mangang chu a vir vel ruai a, an khaw tuikhur hnarah a va daikal ta ringawt mai a.

Daikalna hmun tur pangngai ni lova pitarte a daikal avang chuan an khua chu an buai ta hle mai a. Pitar hnenah chuan, “Engatinge kan tuikhur tlan lai i tihbawlhhlawh vek?” an ti a. Pitarte chuan, “Engatinge Saiin ka awmna in a chil chhiat?” a ti a. Sai chu an han zawt veleh a. “Engatinge Saia i chilchhiat?” an ti a. Sai chuan, “Engah nge ka hnarah Bak a luh ei,” a ti a.

“Engatinge Baka Sai hnara i luh?” an ti a. Bak chuan, “Engah nge Sanghalin ka awmna changel a tai tluk teh ei,” a ti a. “Engahnge Nghala i tai tluk ni?” an ti a. Sanghal chuan “Engah nge Taivangin min seh ei,” a ti a. “Engatinge Taivang i seh?” an ti a. Taivang chuan “Engahnge Ramarin ka bu a thaichhiat teh ei ” a ti a. “Engatinge Ramar i thaichhiat?'”an ti a. Ani chuan “Engah nge ka nguma Kha-umin a den,” a ti a. “Engatinge Kha-um i den?” an ti leh a. Ani chuan “Engahnge Chemtatrawtan ka zamna rawpui a sahthluk,” a ti a. “Engahnge chemtatrawt i sah thluk?” an ti a. Ani chuan, “Engahnge Kaikuangin ka tilah mi cheh ei,” a ti a. “Engahnge Kaikuang i cheh?” an ti ve leh a. Chutia an inchhuahchhal zel hnuah chuan Kaikuang chuan chhuanlam tur a hre ta hauh lo mai a.

A zahzel chuan, “Ih, ih, ih, meia min rawh leh naupang lawmah ka sen vit vet anga, tuia min thlak leh ka dang bim bem ang,” a ti a. Tichuan meiah an rawh a, a sen ta vit vet mai a, tuiah an thlak leh a, a dang ta bim bem mai a.

Hei hi chemtatrawta thawnthu tawpna chu a ni. Amaherawhchu mi thenkhatin an sawi dan chuan Kaikuang tuia an dah leh khan, a nu leh pa khua a thlen hmain midangin an lo man hlauh mai a. Hnahthial kuangin vuakhlum an tum a, an vaw fuh hlei thei lo na a, a tawpah chuan a thi ta tho a ni awm e. Amaherawh chu, a thih tak tak hmain hnahthial kuang chu anchhia a lawh a.

I chi chhuah turte an puitling hmain i thi zel ang, tiin anchhia a lo lawh a. Chuvang chuan hnahthial hi a pung chak lo hle niin an hre thin.

Thulakna: Mizo Songs and Folktales by Dr.Laltluangliana Khiangte