CHAMPHAI JAIL-AH CHAPCHAR KUT HMANG

Nimin khan Prisoners` Welfare Assn. buatsaihin Champhai District Jail-ah Chapchar Kut hman a ni a. He hunah hian Pu C. Vanlalena, Champhai DFO chu Kut Pa  niin a hmanpui a ni.
    Thusawiin Kut Pa chuan Mizo Kutpui 3 zingah Chapchar Kut chukan piputen an nghahhlelh leh hlim ni atana an lo hman thin angin hlim taka hun hmang turin a chah a. Jail tangte chu tang anga an ngaih loh thu leh zalen hun an la nei dawn tih sawiin, an awmna hmun chu an hmalam hun atana insiam thatna hun tha atan hmang turin a fuih a. Khawvel mi ropui tak tak - Pu Nehru Madela te pawh Jail tang tawh an ni tih sawiin, Pu Nehru phei chuan a jail tanna atanga a Indira Gandhi birthday a lehkha a thawn chukhawvel thuziak ropui berte zingami a ni a, chuvangin jail tan hi kan tawpna tur a ni lo, tiin a fuih zui bawk a ni. A sawi zelnaah Pu Vanlalena chuan ramngaw leh nungcha hunhalh a tul thu sawiin, ram tihkan a pawizia a tarlang a. keini Forest Dept. a official te chuan pangpar thi inhlan aiah thing phun tur leh a phuna tur tuthlawh hi kan inpe tawh zawk a ni, a ti a. Jail-a awm mek thalai rualte chu beidawng mai lova, ngaihtuahna leh beiseina that nen midangte tana tangkai, ram leh hnam nghahfak an ni thei tih sawiin, chutiang ni tur chuan Chapchar Kut hlimawm takah hian ngaihtuahna thar pu turin a chah a. DFO hian Prisoner Welfare Assn. hnenah tanpuina Rs. 3000 a hlan nghal bawk.
    Pu Vanlalena hi Pu Ronghaka Colney, YMA Sub-Hqrs. Champhai Vice President chuan a tawiawmin he hunah hian Champhai zaithiam C. Lalrinchhungi leh C. Lalmuansanga ten Kut hmangtute hi zaiin an awi thin a ni.

Thulakna: https://champhai.net