Certificate Ropui Ber

An insawnna in tharah chuan bungrua leh ilo rem felin an han singsa ta map map a.Pa berin a vanglaia infiamna lama mi chungchuang a nih chhinchhiahna a lo dawn Certificate-te, an faten Skul lam – lehkha thiam thei leh infiamna lama chungchuang an nih chhinchhiahna Certificate an dawnte chu bangah an tar a. Chutah Pa ber chuan skul zirsang lo leh thil dang pawha chawimawina Certificate dawn nei  ve lo Nu ber hnenah chuan,"Nu-i, heile; keiniho chuan Chawimawina Certificate kan dawn ho kan tar thluah a,khawi maw nang teh i thilthithat chhiahchhiahna Certificate ve le? " tiin deusawh deuh hlekin a ti ta a. An fate pawh chuan Pa ber thusawi chu tawmpui takzetin, “ Ni chiah e,...” tiin Nu ber chu an melh ha hlawm.

Nu ber chuan  pindana an thingrem chu khawih ri rek rekin a va hawng a, a rawn chhuah leh chuan Lehkha hi a rawn keng chhuak a,"Heile, kei ka Certificate dawn ve chu," tiin an fate pian chhianchhiahna lehkha (birth certificate) chu a rawn phawrh ta! Pa ber leh an fate chuan tawng chhunzawm tur reng an hre ta lo.

An fapa pakhat chu a insum zo ta lo. A nu hnenah mittui tla chungin, “ Ka nu, hmana kan tih theih, vawiina kan tih theih leh nakina kan la tih theih tur zawng zawng hi nangmah vang a lo ni. Nangin min hringin min enkawl seilian lo la chuan vawiin hi kan hmu hauh lo tur. Certificate dang zawng aiin, keini i fate tan chuan i Certificate hi a ropui ber a, a hlu ber bawk...” tiin a nu chu a fawp ta chiam.