Buhfai dinhmun ziaawm; Oil harsa

Food, Civil Supply and Consumer Affairs department hnuaia Mizoram hmun hrang hranga buhfai chhekna lian zual Public Distribution Centre (PDC)-a buhfai chhekkhawl chu tun dinhmunah a tha tlangpui a, fur atana hmun kilkhawr zuala buhfai chhekkhawl pawh zawhfel thawkhat a ni tawh niin thu dawn a ni.

T.Rochunga, Addl.Director, FCS&CA, Director charge la mek sawi dan chuan Zuangtui Kudam-ah nimin thleng khan buhfai quintals 11,350 awmin, Aizawl bakah hian Mizoram hmun hrang hranga recognised PDC 7-ah pawh buhfai dinhmun hi a tha thawkhat a. Buhfai tlem zualnate chu Aizawl atanga thawn mai harsa lo a ni tlangpui tih FCS&CA atanga thudawn chuan a sawi.
Mizoramin sorkar laipui atanga APL buhfai a hmuh dan chu chhungkaw 1 tan kg 35 zel hisap a nih thu leh, hei hi kum 2001-a India ram chhiarpui behchhana pek a nih thu te sawiin, “Mizoram APL buhfai quota hmuh tipung tur hian theihtawp chhuahin kan nawr a, kan la hlawhtling hlei thei lo a ni,” a ti.

Luangmual-a FCI kudam chu FCS&CA hnuai ami a nih loh avangin buhfai an neih dan dinhmun FCS&CA chuan a hriatpui lo tih thudawnna chuan a sawi a. Dan bawhchhiaa buhfai hralh ruk pawh department-in theihtawp a chhuah avangin mipui chan tur buhfai hralh ru an awm tawh meuh lo.

Champhai lam district jail tang ten chaw ei tur buhfai an tlachham tep tih chungchang chu an hriatpui lem lo niin T.Rochunga chuan a sawi a. Jail leh damdawi In te hian a hranpa in supplier an nei a, heng supplier-te hian tender an chhang a, jail-in buhfai lamah harsatna an tawha department lam an pur erawh chuan department chuan a tul anga ngaihtuahsak chu a tihtur a nih tho thu a sawi bawk.

Hetih lai hian rel kawng chhiat avanga tuialhthei (Oil) lama Mizoramin harsatna a tawh mek chu a la zia awm thei chuang lo a. Oil hi Ramnagar-ah nitin truck trip 2 bak a thleng thei rih lo niin thudawnna chuan a sawi.

Badarpur Sector-a rel kawng chhia siamthat mek chu June ni 26 khan rel tlan chhintir (trial run) tum a ni a, mahse an tih hman loh avangin June ni 29 an tinzawn leh a, hemi ni pawh hian ‘trial run’ an la ti thei chuang lo.

July ni 1 khan Guwahati lamah ‘trial run’ ti tura an inpeih thu report a ni a, nimin emaw vawiin emaw hian ‘trial run’ neia an tluan chuan karleh tawp lam atang chuan Mizoramin harsatna a tawh mek chu sutkian theih beisei a nih thu FCS&CA Director charge la mek T. Rochunga chuan The Zozam Times a hrilh.

-------------

PDC hrang hranga
buhfai dinhmun

PDC Quintals

Aizawl 11,350
Kolasib 2,500
Vairengte 5,510
Zawlnuam 2,892
Serchhip 5,400
Champhai 4,000
Khawzawl 3,000
Kawlkulh 2,555
Lunglei 4,800
Hnahthial 1,200
Saiha 1,000
Lawngtlai 2,550
Aibawk 630
Saitual 650

Thulakna: The Zozam Times