Bamboo Dance-a Lam Tamber - Mizoram Mizoramin A Phu Takzet A Ni - Adjudicator

Nimin tlai khan Guinness Book of World Records Adjudicator, London atanga lo  kal Lucia Sinigagliesi chuan Aizawl lammuala cheraw lam thiamte lehmipui sang tam tak hmaah Mizoram mipuite chu tum khata cheraw (bamboo dance)-a lam tam ber an ni tih a puang a, nasa taka lawm a hlawh. A hnua press conference-ah he nihna hi Mizoramin phu a tih thu a sawi.Zawhna chhangin Ms.Lucia chuan lam sei ber a ni nghal em tih chu chutiang lama tehna chu a neih loh thu a sawi. Guinness Book of Wold Records chhuak leh hmasa ber nakkuma chhuak turah Mizoram chu a tel ve hman ang em a sawi thei lo nain a tel ngei a beisei thu a sawi a. Heta Mizoram chanchin ziaktu tur Editorial Team chu nimina lam lai a hmuh dante hrilhin a pui dawn a ni a ti.

Khawvela tum khata cheraw lam tam ber Mizorama nihna tura Mizoram sawrkarin a beihnaah nimin khan Aizawl Lammual leh kawngpui dung hmar lamah Chanmari, chhim lamah Sikulpuikawn inkarah cheraw bu 671, a lam leh a khawngtu 10,736 ten Bamboo Dance-a khawvel record thar an siam a, a hnua Lammuala lamte leh mipui tam tak pungkhawm hmaah Lucia Sinigaliesi chuan khawvela cherawa lam tam ber nih certificate chu Art & Culture Minister Pu P.C.Zoram Sangliana hnenah a hlan. World record siam nan hian minute 5 lam tur a ni a,minute 8 chhung lamin minute 3-in an khum bawk a ni.

Cheraw lam zingah hian bu 156 chu Lammual chhungah an lam a, mi 2,496 an ni a,kawng dungah bu 515 an lam a, mihring 8,240 an ni. Lammuala atang hian lamte chu rimawi hmanga thunun an ni.Chhun dar 12:00 atanga tlai dar4:00 vel thleng chuan Aizawl mihring zawng zawng chu Chanmari lehSkulpuikawn inkarah an awm ta vek mai emaw tih mai tur a ni a. Cheraw lam lai hi Aizawl mipui mai bakah Doordarshan Aizawl chuan ‘live’-a an tih chhuah avangin Mizoram pawn India ram hmun hrang leh khawvel hmundang atangte pawhin an lo thlir a ni.

Thingtlang lam atanga cheraw kantute hnenah vawiin hian lawmman pek a ni ang a,Aizawl khawpui amite chu 15th March, 2010 (thawhtanni)-ah pek an ni ang. Pu PC Zoramsangliana chuan Mizo Culture humhalhna tur leh World Record siamna tur atana tha leh ngaihtuahna leh hun sengtu zawng zawngte chungah lawmthu sawiin he hlawhtlinna hi Pathian vang a ni a ti.

Thulakna : MIZO AW