An La Pawngsual Zel Phawt Ang

-Raymond Lalbiakzama, Advocate

"Corruption chu a zung chawpin kan pho ro ang" tih kha ka lo thlamuanpui viau a, an pho ro tan tawh em tih chu ka hre chiah lo a. Pawngsual pawh hi kan vei viau a, mahse a zung chawpa pho ro lova a lera kan thuai leh ringawt thin chuan a reh tak tak lo ang tih a hlauhawm. Pawngsual chanchin ngaihthlak cham chi hi a ninawm nachungin an pawngsual zel si dawn niin kei chuan ka hria.

Khawvel changkanna chuan kan duh emaw duh lo emaw min chim zel a, kan hriat ngai reng reng loh mobile phone a lo chhuak a kan hum fur ta mai. Mobile phone hmang hian kan duh duh kan bia a, kan inchhung pindan chhungril ber atang pawhin hla tak tak ami nula kan rim a, nulate pawhin an duhzawng tlangvalte chu an lo rim ve bawk a. Kan in chhunga hmeichhe naupang cheia kan la chei tam tak thinlung hi chu khawilam tlangval emaw chuan a ruk tein a lo hneh reng tawh fo a, an intawn remchan hun hun chu mobile phone hmanga an tih theih bak tihna hun remchang atan an hmang duh khawp mai. Hmeichhia zawk kha a bultantu nimahse kum tling lo a nih hlauh chuan dan hmaah chuan pawngsual a ni miau si a, pawngsual a ni der mai.

Lehkhabu dawr leh hmun hran hrana magazine zawrh lai lah hi hralh a tlak deuh nana tih ni awm takin hmeichhe ruak keng kung thlalak leh thuamhnaw maksak tak tak, tisa chakna kaitho thei chi a tam hle. Heng thlalakte hian hmuntin thlengin mi buluk leh pawisak nei lo tak takten an lo hmu a, an tisa chakna a kaihthawh vaih chuan pawisakna nei lek lovin an che leh ta mai si thin, tu emaw chu an pawngsual leh ta pang a.

Kan mobile phone lah hi inbiakna aimaha zai ngaihthlak nan leh picture leh film en nana hmang tangkai zawk kan tam phian. Saruak thlalak leh film tha lo en fo chuan mihring pangngai tisa chakna chu a kaitho lo thei lo a, hmun fianriala tar leh naupangte chu a tuartu an nih leh si. Naupang kher kher pawngsual kan ti a ni mai thei e, mahse nula puitling chhia leh tha hriatna leh thahrui ngah zawk ai chuan naupang awm nem leh bum awlsam zawkte chu an lo zuamawm nge nge si a ni. Mobile phone-a saruak thlalak leh film tha lo tak tak chuan sual tura thlemnaah a hruai lut a, a thlem tlu sauh sauh a, an pawngsual leh ta.

Kan thuamhnaw changkang lutuk hian Mizo la changkan lohzia a tilang. Kan in leh lo, kan ram leh ei leh bara kan dinhmun ngaihtuah miah lovin ram chenbeh ber pawl zing ami hian ram changkang bera cheng sapho thuamhnaw kan entawn tlat hi kan changkan lohna a ni. A bikin hmeichhiate phei chuan thuamhnaw man to leh mipate laka anmahni tilang itawm thei thuamhnaw hi an duhzawng a nih tak tlat avang hian tu tute emaw thinlungah chuan zauthauna a thlen leh nge nge a, khawlai dung leh chhun enga nula kal lai va pawngsual ngawt thu awm suh, hmun fianrial deuha awm, awm nem zawk naupangten an tuar leh thin.

Pawngsualtu lah a luhlul tawk vel lekin reilote jail bang kan han zuttir a, hreawm ti lem lo takin an rawn chhuak ve leh mai a, 'nge ni na vei' ti niawm takin phuba lakna remchang an zawng ran tawh zel si. A bik takin hmeichhe chhungte ngei pawhin an inngaizawng tih an hriatpuia pawi an tih lem loh, mahse an mualpho tak avang maia pawngsual thubuai siamsak leh si pawh hi sawi tur an awm nualin a lang.

Puitling hmuh phak loha naupang vak vel leh tlai khawthim hnu leh zan thleng thlenga school naupang khawlaia vak han hmuh hi chuan 'ngaihtuahtu tur chhungte an nei ta lo emaw ni chu aw' tih a awl duh khawp mai. Chhungkaw nu berin a fate enkawl thulh thakin sakhaw ngawl a vei a, pa ber lahin eng ngawl ber emaw veiin an nupain inchhung an chhuahsan reng a. Enkawltu nei lo an fate chuan vanduaina an tawk leh ta.

Kan hmeichhe thenkhat chuan an thuamhnaw, inchei dan leh chetze uchuak tak tak hmangin mipa tam tak thinlung chu an pawngsual a, an hneh fel thlap hnuah chung mipate chuan tihluihna hmangin remchang hmasaah a rem rem an khawih ta thin a. Heng pawngsualtute hi ka dem lo tihna ni lovin anni aia dem hmasak tur ka nei tih ka rawn tarlanna mai a ni.

Pawngsual hnua kawngzawh leh "....kan duh lo...a na thei ang berin hrem rawh se..." tih leh ringawt thin ai chuan a chhan leh vang hi chhuichiang ila, sim ngai chu simin insiamthat leh inzirtir kan ngaihna laiah chuan insiam thain inzirtir bawk ila. Se bo leh hma ngei hian se kawngkhar i khar ang u, chumi tih nachang kan hriat hma chuan an la pawngsual zel phawt ang.

Thulakna: Vanglaini