Aizawl South-III chhuahsan turin Burma mite hriattir

Chhimphei VC Welfare chuan vawiin khan thuchhuah siamin, Burma mi pakhatin Muallungthu-a hmeichhe naupang Lalhlimpuii a pawngsual leh rawng taka a sawisa chu an dem takzet tih an sawi a. Aizawl South-III bial chhungah reng reng Burma mite an hmel lang tawh lo tura hriattirin, tuna he bial chhung khaw hrang hranga Burma mi lo awm sa emaw, inhlawhfaa awm mekte pawh a rang lama an bial chhung chhuahsan nghal turin an hriatir tih an puang.

Chhimphei VC Welfare chuan an bial chhungah thil duhawm lo a thlen nawn tawh loh nan a tul anga hma an lak zel tur thu te, tualthata puh Vanneihchung @ Henry inti, Burma mi chu chungah an thin a rim takzet tih an thuchhuahah hian an tarlang bawk.

Lalhlimpuii tawhsual tawh chung-chang hi Aibawk RD Block huam chhunga khaw hrang hrang 20-a VC te pawhin nimin piah khan Hmuifang Tourist Centre-ah sawihoin resolution an pass a. Muallungthu-a kum tling lo pawng suala thah anih an dem thu leh hetiang thil thleng tawh lo se an duh thu an resolution ah chuan an tarlang.

Aibawk RD Bloak-a VC 20 huam chhungah ramdang mi awmpui tur leh inhlawhfaa chhawr tur reng rengte chuan an hnathawh tur leh an awm chin tur fel taka ziak langin an awmna VC leh YMA-te hnenah phalna lak hmasak vek nise tih an rel bawk.

Central YMA Central Co-ordination Committee, vawiina CYMA office-a thutkhawm neihah pawh Muallungthu-a thil thleng chungchang hi report ngaihthlak a ni a. Boruak sarhu laite a nih avangin a tul angin ngaihven chhunzawm tha an tih thu sawiin, emergency meeting emaw koa ngaihtuah thuai an tum nia hriat a ni.

Thulakna: The Zozam Times