A, Aw, B Hla by Ch.Pasena Chhiarin Ngaithla Rawh Khai....

Pu Buanga ( J. Herbert Lorrain ) leh Sap Upa ( Fred.W. Savidge ) ten Mizo hawrawp – A, Aw, B... an siam kum hi 1894 a ni ti leh 1893 a ni ti an awm a, engpawh nise; Pu Buanga leh Sap Upate hian Mizoram a luh hma atang tawh khan Mizo tawng hi an lo zir thiam tawh a, kum 1893 khan Mizo hawrawp tur hi an lo siam tan a, kum 1894-a Mizoram an luh hian chu an hawrawp siam chu an chhunzawm ta niin a lang.

Kum 1924-a Sir Herbert Lewis-a’n Ch. Pasena Sâp rama a hruai thlak khân London-a Goldsmith College-ah a senso tumsakin a zirt$r ta kha a ni a. June thla chuan Calcutta atangin Sâp ram panin lawngin an chhuak ta a. Arabian Sea-a lawnga an kal lai chuan sikul naupang a aw b lo la zir zel turte a suangtuah a, awlsam zawka an thiam mai theih dan tur a ngaihtuah a. Vawi leh khatah a thinlungah hla a lo lang ta nghal a, lawng bathlar zau pui maiah chuan tlai ni tlâk dâwnin a aw b hla a phuah ta a. Chu hla chu hei hi a ni. 

A, AW, B HLA

- Pa Sena

Sikul ka luh tirhin mikhual ang ka ni a,

Ka pawl min sawnsakin ka hming an han ziak a;

Mak ti awm fahranin, ‘A’ ka han ti phawt a,

Lungleng awm tak maiin ‘Aw’ ka han ti a.

‘B’ ka han sa ta a chhawn tur van vei vei nen,

Ka kawibawm min ti ngai kan tual zawl nuam tak nen;

Ban hma loh phei chuanin ‘Ch’ ka lam ka lam thin,

Ei tak tak si lovin ‘D’ hmun ka thleng thin.

Phul emaw ka lo ti ‘E’ a ni awmzawng lo,

‘F’ ka han kai lehin a lo Awzia ta zawk;

‘G’ ka han kai phei chuan Vai rim a nam rum rum,

Aieng awm si lovin ‘NG’ ka ti tak chu!

Hahchhiau chhuak ang maiin ‘H’ ka han ti chiam a,

Zungchala kawk zelin ‘I’ ka han ti chiam a;

Mal rawl teuh ang main ‘J’ ka ti thel thawl mai,

‘K’-a kal si lovin thui tak tak ka kal.

Lo zir hmasate kha ‘L’ ngawt ka tum ta a,

Lum ti awm tak main ‘M’ ka ti em awm a;

‘N’ lovin ka zir thin dangnal hunah phei chuan,

‘O’ ka ti o-o thin vawn ka tum vangin.

‘P’ ka lam apiangin ka pu pawh ka hre thin.

‘R’ ka lam erawh chuan kan sumhmun ka hre thin;

‘S’ ka han thlen hi chuan ka saisik seih seih thin,

‘T’ ka kai a chinah ka titi ta thin.

Vairal kian hun pawhin ‘T’ ka ti leh dek thin,

‘U’ kianga ka awmin ka lo uang em em a;

Khuai lamte pawh zirin ‘V’ ka ti vang vang thin,

‘Z’ ka lo thleng ta a ka chhiar zat zat mai.

A, Aw, B Hla by Lalmuanpuii (Class II – PC Girls Scholl) ngaihnawm tak hi ngaithla ngei ngei rawh khai...

Download - Zotui Thiang Mizo A, Aw, B Hla.mp3 (4,3 MB)